Спортпен шыныққан жас ұрпақ – қоғамның басты байлығы. Бүгінде жастарға спортпен шұғылдануға жағдай туғызу үшін ізгілікті шаралар қолға алынуда. Солардың бірі – əрбір ауылдық округтердегі шағын футбол алаңдары. Беті жасанды, жасыл алаңмен көмкерілген Казталов ауданы Қараөзен ауылына қарасты Жас елді мекеніндегі жаңадан салынған шағын футбол алаңы көздің жауын алғандай.
Аталмыш нысанның ашылуына аудан әкімінің орынбасары Зәйлім Мәжитова, Қараөзен ауылдық округінің әкімі Бауыржан Қабдолұлы және ауыл үлкендері мен тұрғындар қатысып, құттықтау сөз сөйледі. Құны 7 млн. 700 000 теңге қаражатты құрайтын құрылысты қолға алған Тараз қаласының мердігері жұмысын сәтті аяқтап, іске қосты.
Шара соңында футбол алаңын бүлдірмей, тоздырмай, ұқыпты ұстауға сөз берген ауыл спортшылары екі командаға бөлініп, жолдастық кездесу ойынын жоғары деңгейде өткізді.
Әсем Халиуллина,
Казталов ауданы
zhaikpress.kz
