Бүгін С.Меңдешев және Мәстексай ауылдық округтерінің әкімдері халық алдында есеп берді. С.Меңдешев ауылдық округінде басталған есептік кездесуге аудан әкімі Дархан Закарин, ауылшаруашылық және кәсіпкерлік бөлімінің басшысы Светлана Бекқалиева, электр торабының басшысы Сәтжан Габдуллин, жер қатынастары бөлімінің басшысы Есен Бекболатов, жұмыспен қамту бөлімінің басшысы Асылан Оразалин, аудандық аурухана басшысы Ербол Сәрсенғалиев, аудандық ветеринария бөлімінің басшысы Берік Шорманов және ауыл тұрғындары қатысты. Алдымен ауыл әкімі Абзал Ахметов тоқсандық атқарылған және алда атқарылатын жұмыстарымен бөлісті.
- Әрдайым да есепті кездесулерде ауыл тұрғындарынан түскен ұсыныс-пікірлерін іске асыру жөнінде іс-шаралар жоспары жасақталып, орындалу жөнінде сіздермен бірге және қоғамдық ұйымдармен ақылдасып жұмыстарды атқарып келеміз. Мал азығының бағасын тұрақтандыру, көктемгі су мәселесі, ауылға көл суын жіберу, тұрмыстық қалдықтарды төгетін орындарды тазалау, ішкі жолдарды қыру, ауылдың бас жобасына және мәдениет үйінің жобасына өзгеріс енгізу, абаттандыру, көгалдандыру жұмыстары және көше жарығы сынды бірқатар маңызды мәселелерді бірлесіп, сіз бен біз болып шешімін тауып жатырмыз. Сондай-ақ жұмыссыздарды азайту бағытында шаруа қожалықтарымен, кәсіпкерлермен жұмыстанып жатырмыз. Ауыл халқының өмір сапасын жақсарту, табысын арттыру, еңбекке баулу мақсатында «Ауыл аманаты» жобасы іске асырылып, тұрғындарға түсіндіру жұмыстары жүргізілуде, - деп қортындыларды ауыл әкімі А.Ғайноллаұлы.
Одан әрі Д.Әмірханұлы ауыл халықының көкейінде жүрген маңызды мәселелер бойынша яғни, кірме жол, ауылішілік жол, мәдениет үйі, жер мәселесі, жайылымдық жерлер, кәсіпкерлік саласындағы жұмыстарға тоқталып және кәсіпкерлер мен шаруа қожалықтары иелеріне қарамағындағы жұмысшы топты еңбек шартына сәйкес жұмысқа алуын сұрады. Ауыл учаскелік полицейі Нұрлыбек Нұрмұқанов мал ұрлығы жөнінде баяндап, ата-аналардың кәмелеттік жасқа толмаған балаларына автокөлік жүргізуіне тиым салуын сұрады. Әрі қарай сұрақ-жауап форматына ұласқан кездесуде ауыл тұрғындары Алпамыс Каменов, Жұмағали Темірғалиев, Амангелді Уса, Самал Кушанова мал азығы, су мәселесі, білім ордасының күрделі жөндеуі туралы және ауылда мәдениет ошағының, амбулаторияның жоқ екенін сөзге тиек етіп, жастар арасындағы жұмыссыздық, заң бұзушылық, аудандық аурухананың жұмыс сапасына қатысты ұсыныс-пікірлерін, сауалдарын жолдады. Қойылған сұрақтар бойынша аудан әкімі, ауыл әкімі және жауапты мекеме басшылары жауап қатты.
Одан әрі несие шарттары, аудан орталығындағы билайн ұялы байланыс желісі туралы және бірқатар жеке мәселелер бойынша сауалдарға Д.Әмірханұлы мен мекеме басшылары жеке қабылдауында жауап берді.
С.Меңдешев ауылдық округінен кейінгі кезекті есепті кездесу Мәстексай ауылдық округінде жалғасты. С.Меңдешев ауылындағы жиынға қатысқан мекеме басшыларымен қатар аудандық білім беру бөлімінің басшысы Руслан Ғұмар, аудандық полиция бөлімінің орынбасары Мэлс Нағымов қатысты. Ауыл әкімі Ержан Тілепбергенов кәсіпкерлік, ауылшаруашылық, мал шаруашылығы, әлеуметтік сала, ауыз су, газ мәселесі жөнінде және ауыл тазалығы, білім, денсаулық саласы туралы биыл атқарылған жұмыстар жөнінде баяндама жасады.
Аудан әкімі Д.Әмірханұлы да аталған округке қатысты алдағы жұмыс жоспарларымен бөлісіп, күні бүгінге дейін Мәстексай бағытына 9 шақырым жол салынғанын тілге тиек етті. Ауылдың кірме жолына сметалық жоба жасақталып жатқанын және Мұқыр елді мекеніне дейінгі жол құрылыс жұмыстары 2025 жылға жоспарланып отырғанын жеткізді.
Жиын сұрақ-жауап форматына ауысып, тұрғындар арасынан Жомарт Бақтыгереев, Жұлдыз Хасанов, Мәнсия Молдыбаева, Шотай Кеңесов, Меңтай Имашев, Асланбек Божанов және Қобылан Мұхамбетов кооператив, жұмыссыздық, көл суының тапшылығы, ішкі жол мәселесі, мектеп жөндеуі мен жылуы, телемонтер, өрт сөндіруші мамандарының тапшылығы, қалаға және аудан орталығына қатынайтын такси бағасы, мал ұрлығы, қазақ радиосы торабының қызметімен қамтамасыз ету секілді бірқатар мәселелер сөз етілді. Аталған сұрақтар бойынша әкімдер және тиесілі мекеме басшылары жауап берді. Есептік кездесуден соң тұрғындар жеке шаруалары бойынша Д.Әмірханұлының қабылдауында болды.
Нұргүл Елтайқызы,
Жаңақала ауданы
zhaikpress.kz
