Аудан халқы үшін төрт түлік малдың алар орны ерекше. Тұрғындардың баптап-күткен малдарының жоғалуы кімге болса да оңай тимесі анық. Сондықтан, қай уақытта болмасын мал ұрлығының алдын алу өзекті мәселелердің бірі. Осы жөнінде Бөкей ордасы ауданының полиция бөлімі мал ұрлығының алдын алу жөнінде анықтама берді.
Ағымдағы жылы аудан көлемінде күні бүгінге дейін барлығы 9 мал ұрлығы фактісі бойынша қылмыстық іс тіркеліп, оның ішінде 7 мал ұрлығы фактісі ашылған екен. Ақ адал малын қарамағандықтан, суық қолдыға оңай олжаға беріп отырғандар да бар көрінеді.
- Қазіргі таңда ауданымыз бойынша мал ұрлығы фактісі күшейіп тұр. Жалпы мал ұрлығының алдын алу бағытында бірқатар іс-шаралар ұйымдастырылғанымен бұл жеткіліксіз болуда. Малын далаға айдап жіберіп, қара күзде қораға қамарда бір жинап аламын деп отырған ағайынның ішінде «Қап, малдан айырылдым» деп бармақ тістеп қалғандары болады. Тіпті, кейбірі малының қашан жоғалғанын білмейді. Кейбірі ен-сырғасыз жібереді далаға. Осындайдан келіп, жоғалған малды іздестіру қиындайды. Ұры ізін суытқан соң, малды таба алмаймыз. Иесіз малдың қолды болуы жиі кездеседі. Қожалық-шаруашылықтағы мал бақташы-малшының алдына салынған. Ал жекенің малы ауылда ен даланы еркін жайлап жүреді. Онысымен қоймай ауыл ішінде, көлік жолында шығып алатыны да бар.
Ұрлықты түбегейлі жою үшін үй жануарларына салғырттық танытпай, малды жайылымға иесіз жібермей, бақташыға қосу керек. Алайда аудан халқы бұл ұсынысымызға немқұрайлы қарап отыр. Аудан тұрғындарына айтарымыз мал ұрлығының алдын алу мақсатында өзіңізге тиесілі төрт түлікке бақташы алып, үй жануарларын күтіп-бағып, қатаң бақылауға алуыңызды сұраймын, - дейді аудандық полиция бөлімі бастығының орынбасары полиция майоры Дидар Құрманғалиев.
Сайқын ауылдық округінде рейд кезінде далалық жерде бағымсыз жүрген малдар анықталды. Жергілікті полицейлер ауылдық округ әкімшілігімен бірлесіп иесіз малды арнайы мал тұрағына қамады. Сондай-ақ, 2023 жылдың 9 ай қорытындысы бойынша мал ұрлығы фактісінің алдын алу, ауыл шаруашылығы жануарларын жаю қағидаларын бұзғаны үшін ҚР ӘҚБтК-нің 408- бабымен мал иелеріне 127 әкімшілік хаттама толтырылып, айыппұл салынған. Сонымен қатар ветеринария саласының заңнамасын бұзғаны үшін ҚР ӘҚБтК-нің 406 -бабымен мал иелерінен 23 құқық бұзушылық анықтап, тиісті жергілікті органдарға іс-құжаттар жолданған.
Ақсәуле Хамзина,
Бөкей ордасы ауданы
zhaikpress.kz
