Жаңа жыл қарсаңында Макаров ауылдық округына қарасты Садовый ауылының тұрғындары үлкен қуанышқа кенелді. Мұнда жаңа мектеп есігін айқара ашты. Ауыл тұрғындарының қуанышымен облыс әкімінің орынбасары Бақытжан Нарымбетов бөлісті.
Жергілікті балалар бұған дейін қабырғасы 1967 жылы қаланған, ал мектеп ретінде 90-шы жылдары ашылған ғимаратта оқып келді. Ол 25 орындық бастауыш мектеп болатын. 5-сыныптан бастап округ орталығына не қалаға қатынап оқуға мәжбүр болған. Енді оның бәрі артта қалды. Заманауи негізде салынға 108 орындық жалпы орта білім беретін мектеп ауылға үлкен қуаншы, жаңа бір леп алып келгендей.
- Облыс бойынша биыл барлық қаржыландыру көздерінен 27 мектептің құрылысы жоспарланған болатын. Соның 17-сі жыл соңына дейін ашылады. Бәйтерек ауданының өзінде келер жылдың басында ашылатын Өркен мектебін қосқанда 4 жаңа білім ұясы ғимараты бой көтерді. Бұл үлкен көрсеткіш деп ойлаймын. Сондай-ақ «Жайлы мектеп» ұлттық жобасы аясында облыста 16200 орынға 18 мектептің құрылысы жоспарланған, оның жартысының құрылысы биыл басталып, 2024 жылы пайдалануға беріледі. Ал қалғанының қадасы келе жылы қағылып, 2025 жылы аяқталмақшы. Бұл істердің бәрі болашақ ұрпақтың, еліміздің игілігі үшін жасалуда. Келер жыл да жақсылыққа толы, берекесі мен мерекесі мол жыл болсын,-деген Бақытжан Хаберұлы ардагер ұстаз Нина Ланцевамен бірге жаңа мектептің лентасын қиды.
Жаңа білім ұясында екі ауысымда 83 оқушы білім алса, мектепалды тобында 12, мектеп жанындағы «Арай» шағын орталығында 17 бүлдіршін тәрбиеленеді. Бүгінгі дейін бастауыш мектепті аяқтап, Макаров ауылына күнделікті тасымалмен оқып жүрген 34 бала енді өз ауылында білім алуды жалғастырады. Мектепте әзірге 12 мұғалім, 3 тәрбиеші қызмет атқарады.
Шағын жинақты жаңа мектеп ғимараты заманауи құрал-жабдықпен жабдықталған.
Яғни мұнда 14 оқу кабинеті, оның ішінде біріктірілген химия-биология, физика-математика, қазақ тілі - орыс тілі, шетел тілі, мультимедия, информатика кабинеттері, спортзал, екі шеберхана, оқу залы мен кітапхана, 70 орындық акт залы, 40 орындық асхана бар.
Нұрсәуле Әбілпейсова,
Бәйтерек ауданы
zhaikpress.kz
