Бәйтерек ауданында 1 желтоқсан – Қазақстан Республикасының Тұңғыш Президенті күніне арналған «Елбасы күні – елдікке құрмет» атты мерекелік шара өтті.
Салтанатты шарада Қазақстан Республикасының Мемлекеттік Әнұраны орындалды.
Сахна төріне көтерілген аудан әкімі Асхат Шахаров аудан халқын Қазақстан Республикасының Тұңғыш Президенті күні мерекесімен құттықтады.
- Еліміздің Тұңғыш Президенті Нұрсұлтан Әбішұлы Назарбаев аз ғана жылда мемлекетті қиындығы көп жолдан аман алып өтті. Мыңдаған жылдар бойы бабаларымыз аңсаған Тәуелсіздік Туын көтеруден оны ұстап тұрудың маңыздылығын ұдайы негізге алған Елбасы әлемнің 150-ден астам елімен дипломатиялық қатынас орнатты. Қазақстан өзге мемлекеттердің даму жолдарын саралап, өзінің көп қырлы саясатын қалыптастырды.
Елбасының ерен еңбегінің арқасында Қазақстан ынтымағы жарасқан іргелі мемлекетке айналды. Бұл - тарихта жеке адамның рөлінің ерекше екенінің айқын көрінісі.
Саналы ғұмырын, білімі мен денсаулығын, еңбегін халқына арнаған Тұңғыш Президенттің өмір жолы барлық қазақстандық азаматқа үлгі.
Мерекеге орай әр шаңыраққа береке, мейірім шуағын тілеймін, - деді Асхат Берлешұлы.
Мерекелік шарада аудан басшысы А.Шахаров Трекин мектебінің мұғалімі Сақыпжамал Ерғаливаны ҚР Президентінің Алғыс хатымен, ауданның өркендеуіне зор үлес қосқан еңбек ардагерлері Ғалымжан Меңдалиев, Владимир Штрыкин, Демеу Нұрманов, Төлеген Балмұхамбетовке «Еңбек ардагері» төсбелгісін салтанатты түрде табыстады.
Сонымен қатар бірқатар тұрғын аудан әкімінің алғыс хатымен марапатталды. Салтанатты шара жергілікті өнерпаздар мен мектеп оқушыларының сазды бағдарламасына ұласты.
Ертай Бимұханов
суреттерді түсірген Сәлім Мәмбетәлиев
Бәйтерек ауданы
zhaikpress.kz
Батыс Қазақстанның маңызды жаңалықтарын біздің Instagram-дағы парақшамыздан және Telegram арнамыздан алғашқы болып біліңіздер
