Алматы қаласында Қазақстан математика пәні мұғалімдері қауымдастығы ұйымдастыруымен математика мұғалімдерінің VIII халықаралық шығармашылық байқауы өтті. Ұстаздардың кәсіби шеберлігін дамыту және мұғалімдердің құзыреттілігін арттыру, сондай-ақ еліміздегі математика пәні мұғалімдерінің басын біріктіріп, тәжірибе, білім алмасуын көздеген байқауға еліміздің түкпір-түкпірінен келген математика, физика және информатика пәндерінің оқытушылары қатысып, өзара мықтыларды анықтады.
Аталмыш байқаудан Бәйтерек ауданының ұстаздары да қалыс қалмады. VIII халықаралық шығармашылық байқауда ауданға қарасты Қасым Қайсенов атындағы мектептің математика пәні мұғалімі Айгуль Убаева бой көрсетті.
Байқауда мұғалімдер екі бөлімде сынға түсті. Бірінші математикалық бөлімде берілген есептердің мәнін тапса, келесі әдістемелік бөлімде тапсырмадағы қателерді тауып, сараптамалық жауаптарын берді.
Сыннан сүрінбей өтіп, біліктілігі мен білімін көрсете білген тәжірибелі ұстаз жүлделі орынға ие болмаса да ұйымдастырушылардың арнайы құрмет грамотасының иегері атанды.
Назерке Сыйлыбаева,
Бәйтерек ауданы
zhaikpress.kz
