Батыс Қазақстан облысының әкімі Ғали Есқалиев Бұлдырты ауылындағы "Айналайын" балабақшасының жұмысымен танысты. "Айналайын" балабақшасы мемлекеттік мекеме ретінде 2001 жылы жұмысын бастады. Қазіргі таңда барлығы үш ақылы топта 70 бала, шағын орталықта 50 бала тәрбиеленуде.
2021 жылы қосымша топ ашылып, кезектілік жойылды. Оқу - тәрбие үрдісін 13 педагог атқаруда. Балабақша соңғы жылдары кең, қос қабатты ғимаратқа көшті. Музыка залы, психолог, дефектолог мамандар үшін жеке бөлмелер жасақтауға мүмкіндік туды.
Облыс әкімі саналы әрі салауатты ұрпақты тәрбиелейтін құтхананы аралап, балалардың бал сәттерін тамашалады. Әсіресе "Айналайын" балабақшасындағы төл жоба - асық бағдарламасына ерекше қызығушылық танытты. Кейін педагогтармен тілдесіп, балабақшаның мәселелерін сұрады. Мәселе сол - қабатты ғимараттың шатыры осалдық танытып, ішке су білініп тұр. Жөндеу жұмыстары 14 млн. теңгені құрайды. Өңір басшысы қаржы қарастырылатынын айтты.
Бауыржан Ширмединұлы,
Сырым ауданы,
zhaikpress.kz,
Суреттер: БҚО әкімдігінің баспасөз қызметі
