Мичурин ауылдық округінде «Айсхаус» спорттық кешені салынуда. «Дина» гипермаркетінің дәл іргесінен бой көтерген кешенде балалар шайбалы хоккей, флорбол (жабық залда ойналатын допты хоккей), мәнерлеп сырғану, шағын футбол, баскетбол, гандбол сынды спорт түрлерімен айналыса алады.
Жоба жетекшісі, шайбалы хоккейден БҚО жастар құрамасының аға жаттықтырушы Линар Гадиятовтың айтуынша, мұнда спорттық құрылғылар, құрал-жабдық - бәрі де соңғы үлгіде болмақ. Мәселен, хоккейшілер мен мәнерлеп сырғанушыларға арналған айдын платиналы мұзбен көмкерілген.
Флорбол, шағын футбол, баскетбол, гандбол ойындарына арналған алаңға жарақат салмайтын спорттық ламинат төселуде. Дәл осындай кешеннің елімізде баламасы жоқ. -Біздің басты мақсатымыз – балаларды спортқа көптеп тарту, соның ішінде хоккейді дамыту. Жас ұрпақты бұл спортқа қызықтыру, шеберліктерін шыңдау мақсатында «Барс», «Арлан» сынды еліміздің бетке ұстар командаларында және шетелдік клубтарда ойнайтын хоккейшілеріміз келіп шеберлік сыныптарын өткізетін болады. Балалар облысымыздың намысын абыроймен қорғап жүрген оралдық «Ястребы» командасының ойыншыларымен танысып, олардан да көп нәрсе үйренері анық.
Біз осында «Динамо» балалар командасын жасақтауды жоспарлап отырмыз. Одан бөлек қыздарды да хоккейге баулуды қолға алғымыз келеді. Соған орай біз республикамызда қыздар арасында шайбалы хоккейдің негізін қалап, оны дамытып жүрген ұлттық құраманың шабуылшысы, бүгінде Швецияның әйелдер лигасында ойнайтын Бұлбұл Қартаңбаймен келісім жасаудамыз, - дейді Линар Гадиятов.
«Пустобаев» ЖК-ның 470 млн теңге жеке инвестициясына салынып жатқан аталмыш кешенді 25 ақпанда ашу жоспарланып отыр. Бүгінде құрылыс жұмыстарының 95 пайызы аяқталды.
Кешен жұмысымен танысқан аудан әкімі Марат Тоқжанов мұндай кешеннің маңыздылығына тоқталып, жұмысына сәттілік тіледі.
Серік Маратұлы,
Бәйтерек ауданы
zhaikpress.kz
