Бөкей ордасы ауданына қарасты Бисен ауылында су жаңа мәдениет үйі пайдалануға берілді.
Салтанатты шараға облыс әкімінің орынбасары Тілепберген Каюпов, облыстық мәдениет және тілдерді дамыту басқармасының басшысы Сайран Дүйсентегі, аудан әкімі Нұрлыбек Даумов пен орынбасары Біржан Меңешов, аудандық мәслихат төрағасы Лариса Қайырғалиева, аудандық ардагерлер кеңесінің төрағасы Тілеген Арыстанбеков бастаған сала басшылары қатысты.
Салтанатты жиында сөз алған облыс әкімінің орынбасары Тілепберген Каюпов:
- Мемлекет тарабынан ауыл, елді мекендердің әлеуметтік-экономикалық ахуалын жақсартуда іргелі бағдарламалар қолға алынып отыр. Бір ғана біздің облысымызда он жеті мектептің құрылысы аяқталды. Өздеріңіз де куәсіз ауданда бір емес бірнеше фельдшерлік-амбулаториялық пункт салынса, міне, бүгін "Ауыл бесігі" бағдарламасы бойынша мәдениет үйі пайдалануға беріліп отыр. Жақсы істер 2024 жылы да жалғасты болсын! Мәдениет үйінің құрылысына атсалысқан мердігерлерден бастап, ауыл азаматтарына алғысымды білдіремін, - деді.
Бисендіктер атынан ардагер-дәрігер Қуаныш Есеев сөз алды.
Нысан құрылысын жүргізген "Қалдығайты" ЖШС-нің бас мердігері Абылай Нұрмұқанбет:
- Бисендік ағайынды бүгінгі қуаныштарымен құттықтаймын. Құрылыстың уақтылы жүргізілуіне, тиісті қаржының дер кезінде бөлінуіне жағдай жасап, қолдау көрсеткен аудан басшылығына, құрылыс жұмысына атсалысқан ауыл халқына серіктестік атынан ризашылығымды білдіремін, - деп символикалық кілті мәдениет үйінің басшысы Екатерина Мөкешеваға табыс етті.
Ал аудан басшысы Нұрлыбек Даумов бас мердігерге алғысхат табыстады.
Су жаңа нысанның лентасын облыс әкімінің орынбасары Тілепберген Каюпов пен ауыл ақсақалы Қуаныш Есеев кесті.
Фойеде қонақтарды ақжаулықты әжелеріміз шашу шашып, ауыл өнерпаздары күмбір күймен қарсы алды. Қонақтар мәдениет үйін аралап көрді. Айта кетелік, екі қабатты ғимаратта кең фойе, концерт залы, жекелеген қызметтік кабинеттер қарастырылған. Су жаңа ғимаратта тек әжетханамен ғана емес, душ кабиналарымен қамтамасыз етіліпті.
Бес бірдей қызметкер жұмыс жасайтын мәдениет үйінде домбыра, көркемсөз, вокал және ән-би үйірмелері жұмыс жасайды.
Ашылу салтанатына кейін аудандық халық театрының сомдауымен Г.Хугаевтың "Қара шекпен" атты әфсанасы қойылды.
Мәдениет үйінің құрылысына "Ауыл бесігі" бағдарламасы бойынша бес жүз миллион теңгеден астам қаржы қарастырылған.
- Құрылыс жұмысы 15 айға жоспарланған еді. Мерзімінен бұрын тоғыз айда аяқталып отыр, - дейді аудандық құрылыс бөлімінің басшысы Қобылан Жанғалиев.
Ұлпан Жакина,
Бөкей ордасы ауданы
