Бүгін – мемлекеттік қызметшілер және ел полициясы күні.
Осы қос саланың мерекесі аудан әкімдігінің үлкен мәжіліс залында бұрын-соңды өтпеген ерекше шарамен айшықталды. Мемлекеттік қызметшілер және жергілікті полиция өкілдерінен құралған команда куиз ойынында бақ сынады.
Ойын басталмас бұрын аудан әкімі аппаратының басшысы Асқар Әжіғалиев қатысушыларды кәсіби мерекемен құттықтап, тартысты да қызықты ойын тіледі.
Аудан әкімі аппаратының атынан «Әкім аппараты» командасы сынға түссе, ауданның әлеуметтік саласына жауапты мамандар «Әлеуметтік сала» командасын құрады. Ауылдық округтерден арнайы келген әкімдер мен мамандары «Нарын» және «Азия» командаларына бөлінсе, жергілікті ауылшаруашылық және кәсіпкерлік, жер қатынастары бөлімдері «Ауылшаруашылығы саласы» командасында ойын көрсетті.
Ой додасына қатысушылар «Сұрақ-жауап», «Киноны тап», «Қисын», «Медиа», «Бәс» секілді бес кезеңде ми ширатып, таным көкжиегін байқап көрді.
Айта кетелік, «Әлеуметтік сала» командасының ойыншылары бірінші кезеңнен бастап тапқырлықтары мен зияткерлік қабілеттерін көрсете алды. «Әкім аппаратының» ойыншылары да қырағылықтарымен көзге түсті. Соңғы кезеңде ұтымды да тиімді бәстің арқасында «Әлеуметтік сала» командасы ұпайларын еселеп, жеңімпаз атанды.
Жүлделі екінші орынға «Әкім аппараты» командасы ие болса, үздік үштікті «Нарын» командасы түйіндеді.
Арайлым Есмағұлова,
Бөкей ордасы ауданы
