Бөкей ордасы аудандық білім беру бөлімінің ұйымдастыруымен ұстаздардың кәсіби мерекесінде жас мамандар мен ардагер ұстаздардың басын қосқан тағылымды шара ұйымдастырылды.
Шараға Уағиолла Нұрғалиев, Сәрсенбай Қуанышалиев, Сандеш Дүйсенғалиева, Тоян Бекенова сияқты бөкейлік ардагерлер арнайы шақырылды.
Басқосудың шымылдығы білім беру бөлімінің әдістемелік кабинет меңгерушісі Айгүл Кадимованың құттықтау сөзімен ашылып, «Танысу» тренингімен жалғасты. Қатысушылар топ болып бөлініп, шеңбер құру арқылы топ мүшелері бір-бірі туралы ақпараттармен алмасты.
Жалпы шара бес бөлімнен тұрды. Әр бөлімде жас мамандарға жағдаяттық сұрақтар қойылса, ардагер ұстаздарымыз қызмет барысында кездесетін жағдайлардан оңай шығудың жолдарын көрсетіп, жас мамандарға кеңестерін берді.
Сонымен қатар, ұстаздық қызметті жүзеге асыру, балалардың оқуға деген қызығушылықтарын арттыру бойынша тапсырмалар да болды. Топ мүшелері берілген тапсырмаларды кейіпкерлер рөлін сомдау арқылы шебер көрсете білді.
Шара соңында ардагер ұстаздарға білім беру бөлімінен құттықтау хат, кәсіподақ ұйымы атынан мерекеге орай сыйлықтар табыс етілді.
Анар Артықбай,
Бөкей ордасы ауданы
zhaikpress.kz
