Қасиетті жұма күні Бас мүфти Наурызбай қажы Тағанұлы хазреттің бұйрығымен Бөрлі аудандық мешітінің бас имамы болып Ерлан Бауыржанұлы тағайындалды.
Бөрлі ауданының әкімі Мирлан Сатқанов пен ҚМДБ-ның БҚО бойынша бас имамы Бақытжан Сабралиев, имамдар Қанат Қаженов пен Ерлан Әйтеновті қабылдады. Бақытжан Құралбайұлы әкімге Бас мүфтидің сәлемін жеткізіп, жаңадан тағайындалған бас имам Ерлан Бауыржанұлын таныстырды. Аудан әкімі Миржан Мұнайдарұлы осы уақытқа дейін Бөрлі аудандық мешітінің бас имамы қызметін атқарған Қанат Қуанышбайұлына ризашылығын білдіріп, алғыс хатпен марапаттады.
Жұма намазына жиналған жамағатқа ҚМДБ-ның БҚО бойынша бас имамы Бақытжан Құралбайұлы Бас мүфтидің ыстық ықыласы мен сәлемін жеткізіп, жаңадан тағайындалған бас имам Ерлан Әйтеновті таныстырды. Сонымен қатар жаңа имамның алдағы уақытта атқарар қызметіне сәттілік тіледі. Қанат имам алдағы уақытта Түркия елі, Анкара университетінің «Иляхият» факультетінің ислам тарихы мамандығы бойынша магистратурада білімін жалғастырады.
Бөрлі аудандық мешітінің бас имамы қызметін атқарған Қанат Қуанышбайұлының иығына шапан жауып, алғыс білдірді.
Ерлан Бауыржанұлы
1990 жылдың қыркүйек айының бірі күні БҚО, Бөкей Ордасы ауданы, Сайхын ауылында дүниеге келген.
2012 жылғы Орал медресе-колледжінің түлегі. Қазіргі уақытта Ақтөбе қаласындағы А. Жұбанов атындағы университетте «Дінтану» мамандығы бойынша білім алуда.
Еңбек жолы:
– 2012-2014 жылдары Бәйтерек (бұрынғы Зеленов ауданы) аудандық мешітінің бас имамы;
– 2014-2021 жылдары Ақжайық аудандық мешітінің бас имамы болған.
Үйленген, 1 қызы, 3 ұлы бар.
ҚМДБ-ның БҚО бойынша баспасөз қызметі
