24 қазан – кітапханашылар күні. Бұл күн 2022 жылы Қазақстан Республикасы Үкіметінің қаулысымен мереке болып бекітілген болатын. Бұл күн тек кітапханашылардың ғана емес, оқырмандардың да мерекесі. Аталған мерекенің басты мақсаты кітапханашы мамандығының имиджін көтеру болып табылады.
Айтулы күнге орай, Бөрлі аудандық мәдениет үйінде «Кітапханашы – парасатты жанға лайық мамандық» атты мерекелік кеш ұйымдастырылды. Шараға аудан әкімінің орынбасары Алтай Тоғжанов қатысып, кітапханашыларды кәсіби мерекелерімен құттықтап, ҚР Мәдениет және ақпарат министрлігінің «Мәдениет саласы үздігі» төсбелгісін Гүлжауһар Есентаеваға және «Қазақстанның құрметті кітапханашысы» төсбелгісін Майра Жүсіпәлиеваға табыстады.
Мерекелік шара барысында аудан әкімінің орынбасары Алтай Тоғжанов аудан әкімі Еркебұлан Ихсановтың алғысхатымен Айша Есенжанова, Айсұлу Ишанова, Майра Маймирова, Алтын Ғұбайдуллина және тағы басқаларды марапаттады. Сонымен қатар БҚО мәдениет, тілдерді дамыту және архив ісі басқармасының алғысхатымен Қарлығаш Ғизатуллина, Алтын Алпысбекова және тағы басқалар да марапатталды.
- Бөрлі ауданының орталықтандырылған кітапханалар жүйесі бүгінгі таңда аудан тұрғындарына кітапханалық ақпараттық қызмет көрсетіп отырған үлкен бір мәдени кешенге айналып отыр. Жалпы ОКЖ-ға қарайтын ауданымызда 26 кітапхана бар. Олардың 8-і қалада, 18-і ауылдық жерлерде орналасқан. Және 4 бөлім қызмет етеді. Осы кітапханаларда 120-ға жуық кітапхана қызметкерлері еңбек етуде. Дәл қазіргі уақытта ауданымыздағы 2 кітапхана қайта жаңғыртудан, яғни модернизациядан өткелі отыр. Бұл дегеніміз, оқырмандарға заманға сай технологиялармен жабдықталған, жаңа әдебиеттермен қамтылған кітапханалар алдағы уақытта қызмет көрсететін болады, - дейді аудандық орталықтандырылған кітапханалар жүйесінің директоры Айгүл Мұсаева.
Шара әрі қарай аудандық демалу орталығы өнерпаздарының және аудандық кітапхана оқырмандарының дайындаған концерттік бағдарламасымен жалғасты.
Айдана Абдрахманова
Бөрлі ауданы
