Жаңақала ауданы әкімдігінің үлкен мәжіліс залында Жаңақала ауданын төрт жыл басқарып, оның өсіп-өркендеуіне, әлеуметтік-экономикалық дамуына сүбелі үлес қосқан Наурызбай Қарағойшинге құрмет көрсетілді.
Алқалы жиында аудан әкімі Дархан Закарин Н.Қадырбайұлының Жаңақалаға сіңірген елеулі еңбегін айрықша атап өтіп, алғыс-ризашылығын айта келе, Жаңақала жұртшылығының атынан алғыс хат табыс етті. Одан әрі Наурызбай Қадырбайұлы өзінің еңбегін елеп-ескеріп, арнайы құрмет көрсеткені үшін аудан әкімдігіне және ауданды басқарған жылдары қолдау көрсетіп, қоян-қолтық жұмыс істеген аудан тұрғындары мен еңбек ардагерлеріне зор ризашылық, алғаусыз алғысын жеткізді. Артынша жылы лебіз кезегін ауданның ардақты азаматтары Махсот Шапихов, Айтуған Шарафутдин, Тыныштық Өтешқалиев, Шаһидолла Әбуғали алып, қызметтес болған кездердегі ескірмейтін естеліктерімен, қызықты сәттерімен бөлісті.
Сонымен қатар Н.Қадырбайұлының аудан үшін жасаған игі істерін айта келіп, алдағы жұмысына сәттілік, толағай табыстар тіледі. Одан кейін сөз алған аудандық «Жаңарған өңір» қоғамдық-саяси газетінің редакторы А.Ермекқалиев Н.Қадырбайұлының аудан жастарына деген жанашырлығы мен қамқорлығы үшін ризашылығын білдірді.
Қашанда қарапайымдылығынан танбай, «елім», «жерім» деп қызмет еткен Н.Қадырбайұлына «Бірлік» мал зауытының директоры Қанат Ешімов, шаруа қожалық жетекшісі Талғат Бәйкенов сынды азаматтар да шынайы алғыстарын білдіріп, жүрекжарды лебіздерін жеткізді.
Құндыз Мержанқызы
Жаңақала ауданы
zhaikpress.kz
