«Сырым елі» газетінің ел ішіндегі еңбек адамдарын таныстыруды жалғастырады.
Редакциямызға көп оқырман «Мына кісіні жазсаңыздар! Шаруа адам», - деп өз ауылдастары жайлы жылы сөздерін жолдап жатады.
Шолақаңқаты ауылдық округі, Құспанкөл ауылында тұратын Жанұзақ Санатов та еңбегін ел мойындаған азамат екен. Ол «Правда» шаруа қожалығының малшысы.
Жанұзақ Елтайұлы 1983 жылы Сырым ауданы Ақырап ауылында дүниеге келген. 2016 жылы жанұясымен Құспанкөлге көшті. Дәнді маңдай терімен суарған диқан Қайрат Меңдіғалиевпен танысып, шаруашылыққа жұмысқа қабылданды.
Оған табын-табын малдың бағымы жүктелді. Міне, сегіз жыл болды Жанұзақтың шыбыртқысы қолында, құтты қызметін абыроймен жалғастыруда.
– Ұжымның соның ішінде Жанұзақтыңда жауапкершілігі арқасында малдың қыстау, төлдеу кезеңдері көп шығынсыз өтіп келеді, - дейді ол туралы әріптестері.
Айта кетейік, «Правда» қожалығы 2000 жылы құрылған.
Қайрат Меңдіғалиев негізін салған шаруашылық барлық көрсеткіштер бойынша округте алдыңғы қатарда. Шолақаңқаты ауылдық округінің әкімі Ерлан Журалиевтің айтуынша, Қайрекең – ауылшаруашылық саласының білікті маманы, өзінің және қызметкерлерінің жұмысын ұйымдастыра алатын, талап қоя білетін басшы.
Егін және мал өсірумен айналысатын қожалықтың меншігінде бүгінде 350 бас ірі қара малы, 550 бас қой, 372 бас жылқы бар. 1315 га егістік алқабында қар кетісімен дүрілдеген еңбек. 1366 га жайылым түліктердің игілігінде.
Меңдіғалиев мырза өзі еңбек адамы болғасын, еңбек еткен кісіні бағалайды. Қожалық иесі 2023 жылы малшысы Жанұзақ Санатов үшін жаңадан 3 бөлмелі тұрғын үй салып берді. Жанұзақ жары екеуі жанұясында 3 қызы өсіріп отыр.
Кеше Жанұзақты дала жұмысынан сәл дегбір тауып жаңа үйінің төрінде бел жазып отырған сәтінде суретке түсіріп алдық.
Бауыржан Ширмединұлы
Сырым ауданы
