Бөкей ордасы аудандық мәслихатының депутаты, бисендік "Пахман" шаруа қожалығының жетекшісі Ермек Меңдешев пандемия басталғалы елге шын жаны ашитынын сөзімен емес, ісімен анық дәлелдеп келеді. Уханьнан басталған індет ел іргесіне жеткен кезден қор ашып, қаржы жинауға бастамашы болғаны белгілі. Күні кеше Мәскеуден екі кісілік оттегі концентраторын алғызып, аудандық ауруханаға табыстаса, күні кеше Бисен ауылдық амбулаторияға 200 000 теңгенің дәрі-дәрмегін жеткізді. Әр кезде игі іске қолдаушы боп, жақсылықтың жанынан табылатын Ермек Меңдешевке ел риза.
Игі істен Сайқын ауылының волонтер жастары да қалыс қалмауда. Олар "Ақ халатты абзал жандар ауырмасын" акциясын қолға алып, қымыз сусынын алып берген болатын. Енді оны аяқсыз қалдырмай, қайырлы істерімен жалғастыруда.
Жеке кәсіпкер, "Перекресток" кафесінің қожайыны Алтынгүл Саменованың демеушілігімен аудандық аурухананың провизорлық бөлімінде қызмет жасап жатқан медицина қызметкерлеріне ыстық тамақ пен таза су жеткізді.
Тек мұнымен шектелмей, Қытайдан жолданған медициналық құралдарды облыс орталығынан жеткізіп берді. Нақтырақ айтсақ, 4 пульсоксиметр құрылғысын табыс етті.
Осы аптада Бөкей ордасы аудандық ауруханасына Ресей елінің Астрахань қаласынан дәрі-дәрмек келді. Оған қоғам қайраткері Иманғали Тасмағамбетовтың бастамасымен «Сәби» қайырымдылық қоры қолдау көрсетті. Ал дәрі-дәрмектердің ауданға жеткізілуін Қазақстан халық ассамблеясының жергілікті өкілдері қамтамасыз етті.
− «Сәби» қайырымдылық қоры арқылы Астраханьнан жеткізілген дәрілік препараттар коронавирусқа шалдыққан науқастардың денсаулығын оңалтуға аса қажетті, тап қазірге дейін тапшы болған препараттар. Жалпы сомасы 2 000 000 теңге құрайтын медициналық жәрдемнің ішінде қажетті медициналық бетперде мен электронды термометр де бар,- дейді аурухана басшысы Анарбек Белисанов.
Еркебұлан Рахметолла,
Бөкей ордасы ауданы
zhaikpress.kz
