Бүгін Құрманғалиев атындағы Қаратөбе аудандық мәдениет үйінде ұлттық мейрам Республика күні мерекесіне арналған салтанатты шара өтті.
Салтанатты жиында сөз алған аудан әкімі Қадыржан Сүйеуғалиев аудан тұрғындарын Республика күні мерекесімен құттықтады.
– Баршаңызды Ұлттық мереке – Республика күнімен шын жүректен құттықтаймын! ҚР Президенті Қасым-Жомарт Тоқаев ұлт ұясы Ұлытау жерінде өткен құрылтайда: «Ұлттық мерекелер мен атаулы күндер тізбесіне бірқатар өзгеріс енгізген жөн. Республика күні елдің мемлекет құру жолындағы тарихи қадамының символы болуы керек. Қазанның 25 күні жыл сайын Егемендік күнін еліміздің басты мерекесі ретінде атап өтуіміз қажет» деп Республика күніне ұлттық мереке мәртебесін қайтаруды ұсынды. Президентіміздің бұл саяси шешімі егемендікке арқау болған декларацияны қабылдау туралы тарихи құжаттың салмағын еселеп, Тәуелсіздігіміздің тұғырын бекіте түсті.
Тарихи мәні терең, идеологиялық жүгі жоғары айтулы күн еліміздің бүгіні мен ертеңіне адал қызмет ететін, ерен істер мен елеулі бастамаларды жалғастыратын барша азаматтың отаншыл рухын оятып, сенім мен жауапкершілік сезімін қалыптастырады.
Тарихи әрі идеологиялық мән-маңызы зор, тәуелсіз еліміздің ұлық мерекесі баршаңызға игілік, бақ-дәулет, ырыс-несібе әкелсін, - деді аудан әкімі Қадыржан Орынбасарұлы.
Салтанатты шарада жас мемлекеттік қызметші Нұрбол Кеңесов ант қабылдады.
Мерекеге орай Қазақстан Республикасы Парламенті Мәжілісінің және «AMANAT» партиясының төрағасы Ерлан Қошановтың атынан Құрмет грамотасы ауданның білім саласында қажырлы еңбек етіп жүрген Ақмарал Ерсайынқызы, Әсел Есеналықызына табысталды.
Салтанатты жиын аудан көркемөнерпаздарының «Қазақ күні – ұлт күні» атты мерекелік концертіне ұласты.
Концерттік бағдарламада Н.Салауат пен Г.Жәрдем «Дала дастаны» әнін, «Қаратөбе» квартеті «Асыл мекенім» әнін, Қ.Жұмалиев атындағы мектеп-гимназиясының оқушылары «Туған жер», хор «Пай-пай қазағым-ай» әнін орындады. Мекелік шараны Р.Ақташев «Аманат» әнімен қорытындылады.
Серікбай Хасанов
Қаратөбе ауданы
