Каринаға құрмет көрсетті

Бәйтерек ауданы әкімі Марат Тоқжанов Дариянда​ әлем чемпионы Карина​ Сисенованы қабылдап, құрмет білдірді.

Қабылдауға Каринамен бірге бапкері Руслан Аристанов та келді.

-Елдің мерейін асыратын спортшыларды қазақ елі қашан да құрмет тұтады. Әлемді мойындатып, түрткүл дүниеге қазақ қызының қайсарлығын таныта білген өзіңе алғысымыз шексіз. Бұл жетістік қандай маңдай термен келгенін білеміз. Спортшының жеңісінде бапкерлердің де еңбегі зор. Болашақта да отанымыздың атын әлемге таныта беруге тілектеспін, -деді аудан әкімі Марат Тоқжанов құттықтауында.

Құрметке разы болған Карина Сисенова әрі қарай да жаттығуын күшейтіп, ел мерейін асыра беру жолында еңбек ете беретінін айтты.

-Бала күнінде алдыма келіп, тынымсыз еңбек етіп жүрген Карина өзінің спорттық жолындағы алғашқы үлкен жетістігіне жетті. Алдағы уақытта да бірлесе жұмыстанамыз. Ел құрмет көрсетіп, ризашылығын білдіруде. Қазақ елінің үмітін ақтай беруге күш саламыз, -деді Карина Сисенованың бапкері Руслан Аристанов.

Айта кетейік Карина Әбу Дабиде өткен ММА-дан әлем чемпионатында төрткүл дүниенің чемпионы атанды. Егемен елінің Көк байрағын биіктен желбіретіп, ел спортының жұлдызына айналуын тілеген аудан басшысы құттықтау хат ұсынып, бағалы сыйлық табыстады.

Арал Болпышұлы,

Бәйтерек ауданы

zhaikpress.kz