26-27 қараша күндері Казтадов ауданына қарасты Қарасу ауылын Жаңақала арқылы Орал қаласы бағытымен байланыстыратын «Арыстан» бөгеті жөнделіп, жергілікті ауыл тұрғындарының күшімен қайтадан қалпына келтірілді. Ел игілігі жолында маңызы өте зор бұл бөгетті қарасулық ағайындар қажет болған жағдайда үнемі өз күштерімен жөндеп алуды дағдыға айналдырды десе де болады.
-Осы жолы ауыл тұрғындары Өнербек Қуанышқалиев, Ерлан Сәрсеков, Жасенбай Мұханбетов, тракторшы Ізбасар Молдағалиев, Манарбек Науырзов, Рауан Асқар, ауылдың аға буын азаматы Жұмағұл Мұқанбетов өзінің «ГАЗ 53» автокөлігімен ауыл азаматтарымен бірге үлкен қолғабыс жасады, - дейді Қарасу ауылдық округінің әкімі Сұңғат Қажығалиев.
Ауыл тұрғындарының қарым-қатынасын реттеу жолында белсенділік танытқан қарасулық ағайындарға алда да ауызбірлік тілейміз.
Қыдыр Харесұлы
Казталов ауданы
