Өткен жылы Казталов ауданына қарасты Тереңкөл ауылдық округі бойынша аудандық электр торабы желісі мекемесімен округ аумағы бойынша жалпы ұзындығы 11,6 км электр желісі сымдары ауыстырылды. Оның 3,8 км Беспішен ауылында ауысса, 7,8 км округ орталығы Нұрсай ауылында тартылды.
Сонымен қатар өткен жылы округте ескі 118 электр бағанасы жаңа, талапқа сай бағанамен ауыстырылды. Оның 50 данасы Беспішен ауылы, қалған 68 дана Нұрсайда ауысты. Қазіргі таңда осы сымдар мен бағаналарды ауыстырудың арқасында ауылда электр желісі, электр энергиясын беру тұрақталды. Тағы айта кететін жәйт, аудан әкімінің бастауымен 2023 жылы округ әкімі аппараттарын ынталандыру мақсатында өздерінің 35 негізгі бағыттағы жұмыстарының қорытындысы бойынша округіміздің әкімі аппараты жүлделі бірінші орынға ие болып, аудандық трансферт есебінен 2024 жылы қосымша 15 млн қаржымен қаржыланған болатын. Сол қаржының басым бөлігі жаңа автокөлік алуға кетсе, тағы бір бөлігі ауылдағы 60-ыншы жылдардағы қордаланған күл-қоқысты шығаруға кетсе, енді бір бөлігі Нұрсай ауылының кіре берісіне 1 км қашықтыққа 40 дана жарық шамын орнатуға жұмсалып, қазір іске қосылып, ауылға сән, ауыл тұрғындарының қолайлығына қызмет етіп тұр. Беспішен ауылына да төртінші деңгей салықтық түсімдер есебінен жаңа 7 дана жарық шамы орнатылды.
Ауыл тұрғыны Қасым Суйншкалиев:
- Биыл ауылымызда ауыл ішіндегі жарық сымдары мен бағаналары ауысып, ауылымыздағы электр қуатын беруді тұрақтандырды. Бұрын қырау кездері, қар жауған кезде ауылда электр жарығы үнемі өшіп қалатын еді, бұл кішкентай баласы бар, жылу жүйесін жаңаға ауыстырған үйлер үшін өте қолайсыз еді. Өткен жылы бәрі тұрақталып, жарық беру үздіксіз жүріп тұр. Сондай-ақ әкім аппаратының биыл ауыл кіреберісіне орнатқан 40 жарық шамы ауылға сән береді. Біз секілді кешкі мезгілде серуендейтін адамдарға тіптен қолайлы жағдай болды. Сол үшін округ, аудан әкімшілігіне алғысымызды білдіреміз. Елімізде осындай игі істер жалғасын таба бергей, халық үшін үкімет тарапынан ауқымды жұмыстар атқарылуда.
Жұлдыз Асқар
Казталов ауданы
