Казталов ауданында мемлекеттік қызметшілер арасында волейболдан аудан чемпионаты өтті.
Чемпионатта Батыс Қазақстан облысы әкімдігі және Орал қаласы, Бәйтерек, Ақжайық, Бөкей ордасы, Казталов аудандары әкімдіктерінің қызметкерлері бақ сынады. Тартысты өткен жарысқа аудан әкімі Рүстем Зұлқашев қатысты.
Еліміздегі бұқаралық спортты дамыту және мемлекеттік қызметшілер арасында спортты насихаттау мақсатында ұйымдастырылған бәсекенің бас жүлдесіне Бөкей ордасы ауданының командасы ие болса, жерлестеріміз ІІ орынды иеленіп, Ақжайық ауданы әкімдігінің командасы үздік үштікті түйіндеді.
Ал БҚО әкімдігінің командасы «Жеңіске деген жігерлігі үшін» арнайы дипломымен және Орал қаласы әкімдігінің құрамасы белсене қатысқаны үшін марапатталды.
Сонымен қатар ақжайықтық Азамат Үмбеталиев «Үздік шабуылшы», казталовтық Айдос Асқар «Үздік байланыстырушы», бөкейордалық Эмиль Темірбекұлы «Үздік ойыншы» бәйтеректік Сұлтан Хайрушев «Үздік қорғаушы» және оралдық Асылжан Хайруллин «Үздік тосқауыл қоюшы» аталымдарына ие болды.
Асылбек Нәсіпқали
Казталов ауданы
zhaikpress.kz
