Кез келген қоғамның дамуының негізі, барлық жоспарланған мақсатқа сәтті қол жеткізудің кепілі – еңбекқорлық пен табандылық. Жыл сайын елімізде қыркүйектің соңғы жексенбісі Еңбек күні аталып өтіледі.
Еңбек күнін мерекелеудің басты мақсаты – еңбекке деген құрметті жандандыру, жұмысшы кәсіптерінің мәртебесі мен беделін арттыру. Қазақстанның бүгінгі таңдағы зор жетістіктері еңбек ардагерлерінің, еңбек өкілдерінің жасампаз еңбектерінің арқасында жүзеге асқаны анық. Олар жастар бойына еңбекке, жұмысшы мамандыққа деген сүйіспеншілікті, Отанға деген жоғары патриоттық сезімді оятып, өздерінің бай кәсіби тәжірибесін жастармен бөлісуде.
Бүгін Еңбек күні қарсаңында ауданымызда «Amanat» партиясы Казталов аудандық филиалының және аудандық жұмыспен қамту және әлеуметтік бағдарламалар бөлімінің ұйымдастыруымен еңбек ардагерлерімен кездесу өтті.
Кездесуге ауданымыздағы еңбек ардагерлері, бөлім басшылары, мұғалімдер мен жоғары сынып оқушылары қатысты. Кездесуде «Amanat» партиясы Казталов аудандық филиалының төрағасы Сәкен Ищанов сөз алып, барша қатысушыларды Еңбек күні мерекесімен құттықтады және кездесуге шақырылған қонақтарды таныстырып өтті.
Кездесу барысында еңбек ардагерлері кезек-кезегімен өз өмір жолдары туралы баяндап, еңбектегі тәжірибесімен бөлісті. Энергетика саласында табан аудармай 35 жыл еңбек еткен, «Еңбек ардагері» медалі иегері Мұқанғали Бақтығалиұлы Бектілеуов өзінің балалық шағы, еңбекке ерте араласқандығы мен сол замандағы кейбір қиыншылықтар туралы айтып, жас жеткіншектерге еңбектен қашпай, жалқаулықты жеңе білу қажеттігі туралы ақылын айтты.
– Біз еңбекке ерте араластық. Оқушы кезімізден шөп шабу, қой қырқу деген сияқты жұмыстарды атқардық. Шамның жарығымен сабағымызды да оқыдық. Ол кездегі мектептің күйі де қазіргідей емес. Солардың біріне қарамастан біз еңбекке де, сабаққа да үлгеруші едік. Қазіргі сіздердің замандарыңыз керемет. Жарқыраған мектеп, жағдайдың барлығы жеткілікті. Сіздерден бар талап етілері тек ерінбей оқу ғана. «Адамды адам еткен еңбек» демекші болашақтағы зор жетістіктерің тек еңбектің арқасында болмақ, - деді Мұқанғали аға өз сөзінде.
Әлеуметтік салада 40 жылдай еңбек еткен, «Еңбек ардагері» медалімен марапатталған Әлия Төлемісқызы Жұмағазиева және Казталов аудандық ауруханасында қызмет еткен зейнеттегі рентгенолог-дәрігер Темірғали Ниетқалиұлы Сармалаев өз еңбек жолдарын, қызмет барысындағы қызықтар мен қиыншылықтар туралы өнегелі әңгімелерін айтып, балаларды еңбектің қиындығынан қашпауға, жақсы дағдыларды қалыптастыра білуге шақырды.
Мектеп оқушылары еңбек ардагерлеріне өз көкейлеріндегі сұрақтарын қойып, еңбек ету, жұмыс, елге қызмет жасау турасындағы өз пікірлерін ортаға салды. Оқушыларға интелектуалдық сұрақтар қойылып, еңбек тақырыбындағы мақалдардың жалғасын табу ойыны ойнатылды.
Кездесу барысында белсенділік танытқан оқушыларға шағын сыйлықтар беріліп, еңбек ардагерлері арнайы алғысхатпен марапатталды.
Жансая Жұмажанқызы
Казталов ауданы
