Казталов ауданы мектептерінің түлектері арасынан «Алтын белгі» иегерлері қатарынан үміткер ретінде тіркелген Айкүн Серікқалиқызы - Ғинаят Молдашев мектебінің бүгінгі мақтанышы. Оның білім мен ғылымға деген тынымсыз ізденісінің нәтижесі — халықаралық дәрежедегі байқауда жарқын жеңіске жол ашты.
- Серікқалиқызы Айкүн кеше ғана елімізде өткен – Халықаралық ғылыми жобалар байқауының жеңімпазы атанып, еліміздің маңдайалды оқу ордасы — Әл-Фараби атындағы Қазақ ұлттық университетінің ректорлық грант иегеріне қол жеткізді. Хәкім Абайдың «Білімдіге дүние жарық» деген сөзі дәл осындай ізденісі мол, білімпаз жастарға арналып айтылғандай. Айкүннің бұл жеңісі – мектебіміз үшін үлкен мәртебе, шәкірттерімізге шабыт, ұстаздар қауымына зор қуаныш. Оның Қазақстанның үздік университетінен білім алуға мүмкіндік иеленуі – білімге ұмтылар табандылығының, талпынысының, биік арманға деген сенімінің жарқын айғағы. Бұл жетістікке жету жолында Айкүннің бойындағы білімге құштарлықты оятып, бағыт-бағдар берген жетекшісі, ұлағатты ұстаз Ақсамал Жұмажанқызының еңбегі де өлшеусіз. Жеңісті күндеріміз көп болсын, - дейді Ғинаят Молдашев атындағы жалпы орта білім беретін мектебінің директоры Мәншүк Ізбасарқызы.
Ел ордасы Астанадан асқақ арманын арқалап келген Айкүнді алтын ұя мектебі ыстық ықыласпен, зор қуанышпен қарсы алды. Оқушылар мен ұстаздардың жүзіндегі мақтаныш сезімі – бұл жеңістің шынайы бағасы! Жарайсың, Айкүн! Сенің табысың — еліміздің ертеңі жарқын боларының кепілі!
Қыдыр Харесұлы,
Казталов ауданы
