24 қазан – Кітапханашылар күні мерекесі ретінде биыл екінші жыл ресми түрде атап өтіледі. Осыған орай Бөрлі аудандық орталықтандырылған кітапханалар жүйесінде «Кітапханашы мәртебелі мамандық» атты мерекелік шара өтті.
Көркем ой құндылықтарының асыл маржандарын ұрпақтан-ұрпаққа жеткізетін, адамзаттың ақыл-ой маржаны жинақталған алтын орда кітапханаларды - ақпараттық және мәдени, заманауи орталыққа айналдырудағы үлкен адами қасиетті, еңбекқорлықты, білімпаз да сезімтал, үлкен шығармашылықпен жұмыс жасайтын кітапханашылар қызметі айрықша.
Мерекелік кешті аудандық мәдениет және тілдерді дамыту бөлімінің басшысы Аңсар Дүйсенов ашып, адамдарды рухани байыту, ілім-білімге, көркемдікке баулудағы кітаптың, оны насихаттаушылар - кітапханашылар қызметінің маңыздылығын атап айтты.
Кітапханашыларды қызу құттықтаған Аңсар Есіркепұлы кітапхана ісінің дамуына айрықша үлес қосқан еңбегі үшін Бумакөл ауылдық кітапхана меңгерушісі Майра Маймирова «Қазақстанның құрметті кітапханашысы» төсбелгісімен, Бөрлі ауылдық модельді кітапханасының меңгерушісі Ирина Буянкина «Қазақстанның құрметті кітапханашысы» төсбелгісімен марапатталды.
Сондай ақ салтанатты шарада БҚО әкімінің орынбасары Бақытжан Нарымбетовтың алғысхатымен ақпараттық-библиографиялық бөлімінің библиографы Жанна Мубаракова марапатталды. Аудан әкімінің орынбасары А.Тоқжановтың алғысхатына Жарсуат ауылдық кітапхана ұжымы, Пугачев ауылдық модельді кітапхана ұжымы, орталықтандырылған кітапханалар жүйесінің есеп бөлімі ұжымы ие болды.
БҚО мәдениет, тілдерді дамыту және архив ісі басқарма басшысының алғыс хатымен №3 қалалық кітапхана меңгерушісі Айша Есенжанова, Қарағанды ауылдық кітапхана меңгерушісі Гулжаухар Есентаева, орталық балалар кітапхана филиалының меңгерушісі Нургул Ерменгалиева марапатталды.
Жұбан Молдағалиев атындағы БҚО әмбебап ғылыми кітапхана директорының алғыс хатына ие болғандар қатарында орталық аудандық кітапхана кітапханашысы Іңкар Жамбулова мен Қарақұдық ауылдық кітапханасының кітапханашысы Татьяна Канатова жәнге орталық аудандық кітапхана меңгерушісі Сандігүл Ихсанова бар. Ал Хамза Есенжанов атындағы облыстық балалар және жасөспірімдер кітапханасы директорының алғыс хатын Қанай ауылдық кітапхана меңгерушісі Алтынзер Аубакирова алды
Бұдан басқа да бір топ кітапханашы аудандық мәдениет және тілдерді дамыту бөлімі басшысының атынан, Қазақстан Республикасы салалық мәдениет қызметкерлері кәсіподақ комитетінің атынан марапатқа ие болып, кітапхананың тұрақты оқырмандарының видеоқұттықтаулары тыңдалды. Аудандық демалу орталығының әншілері ән-жырдан шашу шашты, Пугачев моделді кітапханасының тұрақты оқырмандары, мектеп оқушыларының құттықтауы да жанға жылу сыйлады.
Осы жылы мерейлі жасқа толған кітапханашыларға, кітапхана ісінің ардагерлеріне де ерекше сый-құрмет көрсетілді.
Шараның ең қызықты тұсы-жас кітапханашылардың ант беруі болды. Кітапты сүюге, жақсы кітапты жарнамалап жүруге, жас ұрпақты кітап оқуға баулуға ант еткен кітапханашылар «Кітапханашы» әнін шырқап шараны аяқтады.
Дариға Нұрашова,
Бөрлі ауданы
zhaikpress.kz
