Елiмiздiң жоғарғы марапат белгiсi «Алтын алқамен» 7 бала тәрбиелеп отырған көпбалалы ана Бақытгүл Айсағұлова награтталды.
Қазақстан Республикасы Президентінің 2023 жылғы 24 мамырдағы №232 Жарлығы бойынша батыр анаға бұл марапатты Бөрлі ауданы әкімінің міндетін атқарушы Мұхтар Нұрмақов табыстады.
Бақытгүл Серікқызы бала күтімі мен үй шаруасымен айналысып қоймай, Ақсай қаласындағы №3 «Гүлдер» бөбекжайының әдіскері болып жұмыс жасайды. Қазіргі таңда балаларын мейірімді, кішілерге қамқор болуға тәрбиелеп отырған ана.
Көп баланы дүниеге әкеліп, еліміздің демографиясына үлес қосқан отбасылар саны ауданымызда артып келеді. Салтанатты шарада Мұхтар Нұрмақов үш ана - Сағадат Болғамбаева, Мария Олейникова және Жангүл Шалабаеваларды «Күміс алқа» алқасымен наградтады.
Үш анада алты баланы тәрбиелеп отыр. Балаларының алды түрлі салада еңбек етіп, студент атанса, кішкенайлары мектеп жасына дейінгі жаста.
Өз сөзінде Мұхтар Нұрмақов ұрпағының санын арттырып, ел демографиясына үлес қосқан ақжаулықты аналарды құттықтап, жылы лебізін білдірді.
- Ел аузында «Әйел бір қолымен бесікті тербетсе, екінші қолымен әлемді тербетеді» деген сөз бар. Сондықтан аналар әр үйдің берекесі, ұйытқысы.
Біздің Конституция бойынша мемлекеттің ең басты құндылығы адам және оның өмірі болса, сол адамға өмір сыйлайтын — аналар. Дені сау ұрпақты дүниеге әкелетін, болашақ еліміздің патриоттарын тәрбиелейтін сіздер, аналар аман болыңыздар! Дендеріңізге саулық, отбасыларыңызға амандық тілеймін, - деді ол.
Салтанатты шарадан соң, алтын құрсақты аналар аудан басшылығына алғыстарын білдіріп, ел тыныштығын тіледі.
Айым Нұрғалиева,
Бөрлі ауданы
zhaikpress.kz
