Жылдың бастауы ретінде тойланатын көрісу күнінің еліміздің, әсіресе, Батыс өңірінде алатын орны ерекше. Наурыз айында тойланатын мәнді де сәнді дәстүрдің бірі десек те болады. Қаһарлы қыстың бейнетінен аман шыққан халық мәре-сәре болып, үй, ауыл аралайды. Ағайын-туыспен жүздескеніне қуанып, қол алысады һәм төс қағысады. Дәл осы күні олар бір-біріне деген өкпе-ренішін ұмытып, шын жүректен жақсы сөз айтып, амандық тілейді, жаңа жылын бастайды.
Көрісу күніне орай Жәнібек аудандық мәдениет үйінің ұйымдастыруымен өткен бүгінгі шара – осы айтылғандардың дәлелі. Жер аяғы кеңейіп, шуақты көктемнің лебі жеткеніне қуанған ауыл тұрғындарын орталық алаңда аудан өнерпаздары қарсы алып, қол алысса, енді бірі төс қағысты.
Ал ауыл ақсақалдары мен ақжаулықты әжелеріне сәлем салған бір топ келіндер қазақылықтың иісін шығарса, ұлттық нақышпен өрнектелген қос етек көйлегі мен ақ орамалдары болмысымызды бейнелегендей.
Келген қонақтар бауырсақтан дәм татып, көжеден ауыз тиді. Осындай әдемі көрініс театрландырылған қойылыммен жалғасын тапты.
Аудан өнерпаздары қазақ халқының көрісу күнін қалай тойлайтынын, оған айрықша мән беретінін сахналап, көрермендерге мерекелік көңіл күй сыйлады. Қойылым барысында күмбірлеген сазды күйден де, мың бұралған мәнерлі биден де, әуелеген әуезді әннен де шашу шашылды.
Шынар Қаюпова «Келін шайы» әнін әсем орындаса, келіндер қонақ болып келген ауыл үлкендеріне сүт қатқан тәтті шайларын ұсынды.
Көрермендер «Ақмаржан» халықтық би ансамблінің жетекшісі Зәмзәмгүл Мұратованың араға жылдар салып сахна төрінде «Қара жорға» биін мың бұрала билегеніне қуана қол соқты. Әрмен қарай ұлттық ойындармен жалғасты. Көрермендер мен өнерпаздар бірігіп алтын сақа ойынын ойнады, арқан тартысып, қол күресті. Осындай ән мен күйге, би мен ойынға толы мерекелік шарадан жағымды әсер алған көпшілік дарындарға дән риза болып, қошеметін аямады.
Соңында білім саласының ардагері, батагөй қария Қабаш Жүнісов жиналғандарға шын ниетімен ақ батасын берді.
Айсұлу Нұрболатқызы,
Жәнібек ауданы
