Ұзақ жылдан бері Бөкей ордасы аудандық ауруханада еселі еңбек еткен дәрігерлер ерлі-зайыпты Серік және Нәсіп Нүркеноваларға, Ақлима Ишановаға, Әсима Ламашеваларға аудан әкімінің м.а Біржан Меңешев, аудандық аурухананың басшысы Анарбек Белисанов құрмет көрсетіп, зейнеттік демалысқа шығарып салды.
- Өздеріңіздей қастерлі мамандық иелеріне қашан да құрметіміз шексіз. Әрқайсыңыз да көпке сыйлы, халыққа қалаулы қызмет етіп, ел-жұрттың алғысына бөлендіңіздер. Бұл саланың қызығы да, шыжығы да баршылық. Қандай жағдай болмасын көмекке мұқтаж науқастың жанынан табылып, дәрігерлік антыңызға берік болдыңыздар,- деп ақжарма лебізін арнады Біржан Нұрланұлы.
Өз кезегінде аурухана директоры Анарбек Бейбітұлы да қадірлі әріптестеріне жүрекжарды тілегін арнап, кәсіподақ ұйымы атынан арнайы сый-сыяпатын табыс етті.
Зейнеттік демалысқа шыққан әріптес аға-апаларына ұжымдастары жылы лебіздерін арнаса, ардагер ақ халаттылар да шынайы ризашылығын білдіріп, жас мамандарға сәттілік тіледі.
Арай Марат,
Бөкей ордасы ауданы
zhaikpress.kz
