Медицина қызметкерлерінің кәсіби мерекесіне орай Теректі төрінде салтанатты шара өтті.
Жиынға аудан әкімі Әлия Мұханбетжанова арнайы қатысып, ақ халатты абзал жандарға жылы лебізін арнады. Содан кейін медицина саласында еселі еңбектерімен көзге түсіп жүрген қызметкерлерді марапаттады. Аудан әкімінің алғысхатына лайық деп танылғандар қатарында емхана меңгерушісі Еркін Бурабаев, профилактика бөлімінің меңгерушісі Айнұр Темешова және хирург-онколог Асмир Медетов болды.
Сахна төріне марапаттау рәсімін жалғастыруға шыққан Теректі аудандық орталықтандырылған ауруханасының директоры Дархан Хайрушев әріптестерін мерекемен құттықтап, дендерінің сау, жұмыстарының табысты болуын тіледі. Сонымен қатар Саяхат Сағидуллин, Римма Қиясова, Жібек Асауова, Гүлфания Смайлова, Мәншүк Хасанова, Рауза Сұлтанова және Жадыра Мұханбетиярова сынды қызметкерлерге алғыс хат табыс етті.
Бұл кеште кәсіподақ комитетінің төрайымы Эльмира Изимова да сөз сөйлеп, статистика бөлімінің медбикесі Дариға Джапароваға республикалық, Подстепный дәрігерлік амбулаториясының медбикесі Гүлсара Измухановаға облыстық кәсіподақ комитеті атынан алғысхат ұсынды. Сонымен бірге өз атынан бірқатар ақ халаттыға алғысхат беріп, мерейлі 35, 60 жас иелерін де назардан тыс қалдырмады.
Мерекелік концертте «Жұлдыз» үлгілі би ансамблі тамылжыта би билеп, әншілер – Д.Жұмағалиев, К.Қадырғалиева, Қ.Сағидуллин, Т.Бектұрғанова, С.Изделеев және З.Қалмағанбетова әсем әндерді шырқап, көрермен көзайымына айналды.
Аягөз Айтқалиева,
Теректі ауданы
zhaikpress.kz
