Теректі ауданының әкімі Тілек Габдушев Шағатай ауылдық округінің орталығында болып, жергілікті тұрғындарға округ әкімін таныстырды.
Естеріңізге сала кетсек, 25 қыркүйек күні Шағатай ауылдық округінің әкімінің сайлауы өткен болатын. Сайлауға өзін-өзі ұсынған екі және “AMANAT” партиясынан бір кандидат қатысты.
Округ бойынша 1211 сайлаушының 946-сы өз таңдауын жасады. Сайлау қортындысы бойынша 763 дауыс жинаған Рүстем Мүтиев жеңіске жетті.
Рүстем Сейтонұлы 1977 жылы дүниеге келген. Шағатай ауылдық округінің әкімі, Теректі аудандық ішкі саясат бөлімінің басшысы қызметтерін атқарған. Осы уақытқа дейін «Орал қаласының Зачаган кенті әкімі аппараты» мемлекеттік мекемесінің әкімшілік-ұйымдастыру жұмыстары бөлімінің басшысы болып жұмыс істеді.
Жиында аудандық мәслихат аппаратының басшысы Болат Кенжеғұлов жаңадан сайланған әкімге куәлік табыстады. Аудан басшысы Тілек Александрұлы Шағатай ауылдық округінде 4 жылдан бері әкім болған Оразбек Құсайновқа ризашылығын білдіріп, алғысхат пен естелік сыйлығын табыс етті.
Балнұр Қанаева,
Теректі ауданы,
zhaikpress.kz
