Жақында Бөрлі аудандық орталықтандырылған кітапхана жүйесінің ұйымдастыруымен «Үздік оқырман отбасы - 2023» байқауы өтті.
Дәстүрлі түрде өтетін бұл байқау биыл кезекті рет сайыскерлерін жинады.
Байқаудың алғашқы кезеңіне қатысуға 16 өтініш келіп түссе, солардың ішінен екінші кезеңге жолдама алған 9 отбасы арасынан аудандық байқауда үздігін анықтады. Ал осы сайыста бас жүлде иеленген оқырман отбасына мамыр айында Оралда өтетін облыстық «Ақжайық өңірінің үздік оқырман отбасы - 2023» байқауына жолдама берілді.
Сайыққа аудандық орталық аудандық кітапхана атынан Оразкелдиевтер орталық балалар кітапханасы атынан Жаубаевтар, №3 қалалық кітапханасы атынан Сариевтер, Қызылтал ауылдық кітапханасы атынан Мұрат, Бумакөл ауылдық кітапханасынан Сұлтановтар, Қарағанды ауылдық кітапханасынан Беккалиевтер, ал Жарсуат ауылдық кітапханасынан Серіктер отбасы қатысты.
- Өзінің сөзімен ғана емес, ісімен көпке үлгі болып келе жатқын оқырмандарды тану, жаңа буын жас ұрпақтың кітап оқуға деген құштарлығын арттыру мақсатында бұл шара ұйымдастырылып отыр. Байқауға қатысушы отбасыларға сәттіліктер тілеймін. Оқырман отбасы көп болғай, - деді шараның ашылу салтанатында сөз алған мәдениет және тілдерді дамыту бөлімінің басшысы И.Тастеміров.
Байқаудың әділдігін айтып, баға бергендердің қатарында кітапхана ісінің үздігі, ардагер Мариям Сарсенгалиева, №1 қалалық кітапхана меңгерушісі Айжан Каракулова, мүмкіндігі шектеулі жандармен жұмыс секторының меңгерушісі Гүлнара Малбағаровалар болды.
«Отбасым-күншуағым», «Менің отбасым және кітап», «Өнерлі өрге жүзеді», «Отбасылық құндылық» атты төрт кезең бойынша бақтарын сынаған отбасылар өнерлерін аямай, білімдерін дәлелдеді.
Нәтижесінде аудандық байқауда топ жарып, «Ақжайық өңірінің оқырман отбасы» атты байқаудың облыстық кезеңіне жолдаманы жеңіп алған Қызылтал ауылдық кітапханасының оқырмандары Мұрат отбасы болды. Әр кезең сайын өз мықтылықтарын дәлелдеген бұл отбасына көрермен де риза болды. Сонымен қатар Қарағанды ауылдық кітапханасының оқырмандары Кабиевтер отбасы жарыстың бірінші орын жеңіп алып, ауыл тұрғындарының мерейін асқақтатты.
Байқаудың жүлделі екінші орны №3 қалалық кітапхана оқырмандары Сариевтер мен орталық аудандық кітапхананың оқырмандары Оразкелдиевтер отбасыларына бұйырса, үшінші орынға Пугачев ауылдық модельді кітапханасынан Аталиевтер және Жарсуат ауылдық кітапханасынан Серік отбасы отбасы тұрақтады.
Ал орталық балалар кітапханасы филиалының оқырмандары Жаубаевтар «Өнерлі отбасы» және Бумакөл ауылдық кітапхана оқырмандары Сұлтановтар «Белсенді отбасы» аталымдарымен марапатталды.
Байқаудың ажарын аудандық демалу орталығының әншілері келтірсе, әділқазы мүшелері жеңімпаздар мен жүлдегерлерге естелік сыйлықтар табыс етті.
Айым Нұрғалиева,
Бөрлі ауданы
zhaikpress.kz
