Ақжайық ауданындағы Тайпақ орман және жануарлар дүниесін қорғау жөніндегі мемлекеттік мекемесі жылдық жоспарға сай тұқым жинау жұмысына кірісті.
Биыл орман орналастыру жобасы бойынша 100 келі қарағаш тұқымын жинау белгіленген.
Орман күзеті қызметкерлерімен бірлесе отырып, бұл істі жоспарға сай орындауда. Қарағаш – көп жылдық, жапырақ тастайтын ағаш. Суыққа төзімді, көбінесе көгалдандыру мақсатында автожол жиектеріне отырғызылады. Аңызақ желге тосқауыл болу үшін егістіктердің айналасына, сондай-ақ сусымалы құмдарға бөгет ретінде және сай-жыраларды су шаймас үшін егіледі. Сүрегі ауыр әрі тығыз, шірімейтіндіктен түрлі үй жиһаздарын жасауға құрылыс материалы ретінде де жұрт жиі қолданады.
- Жинаған тұқым Қостанай аумақтық тұқымды зерттеу стансасына жіберіліп, оның класы анықталғаннан кейін Тайпақ орманшылығында орналасқан 3 гектар тұқым бағына егіледі. Дәнінен егілген тұқым күз, көктем айларында екпе көшеттеріне пайдаланылады. Биылғы көктемгі екпе ағаштарын толықтыру үшін 10 мың дана қарағаш егілді,- дейді Тайпақ орманшылығының орман шебері Жайлау Құттыбаев.
Еркін Рай,
Ақжайық ауданы,
zhaikpress.kz
Батыс Қазақстанның маңызды жаңалықтарын біздің Instagram-дағы парақшамыздан және Telegram арнамыздан алғашқы болып біліңіздер
