Бәсекелестікке қабілетті білікті мамандар – жарқын келешек кепілі. Әсіресе жұмысшы мамандықтардың қоғамның, экономиканың дамуында атқаратын рөлі маңызды. Сондықтан мемлекет басшысы кәсіптік білімді реформалаудың экономиканы дамытудағы маңыздылығын айқындап, 2025 жылды «Жұмысшы мамандықтар жылы» деп жариялады. Басты мақсат жұмысшы мамандықтардың дәрежесі мен мәртебесін арттыру, кәсіптік-техникалық білім беру саласына ерекше көңіл бөліп, жастарды аталған салаға тарту болып табылады.
Осы орайда аудан көлемінде көптеген жұмыстар атқарылуда. Солардың бірі, Шыңғырлау колледжінде өткен «Еңбек – қоғамның қозғаушы күші» атты кездесу жиыны. Шыңғырлау жастары аудан әкімі Мұрат Өмірәлиевпен, ауданның құрметті азаматтарымен, көпке үлгі еңбек адамдарымен кездесіп, сұхбаттасты.
-Шыңғырлау аудандық колледжінде білім сапасы өте жоғары. Оған дәлел – студенттердің түрлі облыстық, республикалық байқаулардан жүлделі оралып, үлкен жетістіктерге жетіп жүргені. Бұл колледж ұжымы мен студенттердің еңбектерінің жемісі. Барлық жеңістің артында үлкен еңбек тұрады. Сондықтан да, жастар, өздеріңізге мемлекет тарапынан, колледж тарапынан берілетін үлкен мүмкіндіктерді пайдаланып, талмай еңбектеніп, биік белестерді бағындырып, қоғамда ойып тұрып орын алатын азамат-азаматшалар болуларыңызға тілектеспін,- деп, алғы сөз сөйледі аудан басшысы. Кездесу қонақтары - көпке белгілі құрметті азаматтарымыз да сөз алып, студенттерге ақыл-кеңестерін, ақ тілектерін жеткізді.
Шыңғырлау колледжінің 3 курс студенттері, IX республикалық «WorldSkills Kazakhstan-2024» чемпионатында «Кірпіш қалау» құзыреттілігі бойынша «Шеберлігі үшін» медальонымен Ильдар Гайнутдинов, «Batysskills» батыс өңірлік кәсіби шеберлік байқауында «Ауыл шаруашылығы өндірісінің тракторист-машинасі» құзыреттілігі бойынша І орынды иеленген Әмір Тулеушов ауданымыздың мәртебесін көтеріп, жерлестерін қуантқан болатын. Кездесуге мақтаныштарымыздың жанұялары да қатысып, шағын сұхбаттасу өтті. Әр баланың қоғамда өз орны бар тұлға болып шығуында ата-ана тәрбиесінің, алған білімінің, өскен ортасының маңыздылығы жайында әңгіме өрбіді.
Кездесу соңында аудан әкімі Мұрат Амангелдіұлы Әмір Тулеушов пен Ильдар Гайнутдиновтың ата-аналарына үлгілі отбасында адал еңбектерімен өнегелі ұрпақ тәрбиелегендері үшін ризашылығын жеткізіп, алғыс хаттарын табыс етті. Шыңғырлау колледжінің директоры Серікбай Жұмағұлов та колледж мақтаныштарын жеңістерімен құттықтап, алғыс хат, сый-сыяпаттары мен жүргізуші куәлігінің сертификаттарын ұсынып, жиынды қорытындылады.
Әсел Әлім
Шыңғырлау ауданы
