Еліміздің экономикасын дамытып, халықтың әл-ауқатын көтеруде ауыл шаруашылығы саласы маңызды рөл атқарады. Жыл сайын өсіп, өркендеуінің арқасында ел көшін алға жетелейтін жетекші күшке айналды. Сондықтан да осы салада қызмет ететін жандарға қолдау, құрмет қашан да зор. Шыңғырлау ауданының ауылшаруашылық саласы тамырын тереңге жайып, өндірістің өзегіне айналып отыр. Шыңғырлау еңбеккерлерімен, өз ісін дөңгелетіп отырған кәсіпкерлермен, табиғи өнімдерімен ерекшеленеді десек артық емес.
Қараша айының үшінші жексенбісінде Ауыл шаруашылығы, тамақ және өңдеу өнеркәсібі қызметкерлері күні тойланады. Осыған орай аудандық дене шынықтыру-сауықтыру кешенінде салтанатты шара өткізілді. Ең алдымен спорттық жарыс ұйымдастырылып, әр ауылдық округтердің ауыл шаруашылығы саласының қызметкерлері гір тасын көтеру, арқан тартыс және қол күрес ойындарынан сынға түсті.
Шараның ашылу салтанатында аудан әкімінің орынбасары Азамат Бисембаев сөз сөйлеп, мереке иелерін құттықтап, жарысқа сәттілік тіледі. Қызу әрі тартысты өткен спорттық ойын көптің назарын байлады. Әр ауылдан келген мықтылар бақ сынасып, үздіктердің үздігі анықталды. Кейін мереке иелеріне арналып, мерекелік бағдарлама ұсынылды.
Салтанатты жиын ауылшаруашылық саласында осы уақытқа дейін атқарылған жұмыстар бойынша дайындалған бейнероликпен басталды. Кейін аудан әкімі Мұрат Өмірәлиев құттықтау сөз сөйлеп, елеулі еңбектерімен ерекшеленген ауылшаруашылық саласы қызметкерлерін марапаттады.
Атап айтсақ, «Еңбек ардагері» медалімен, Батыс Қазақстан облысының ауыл шаруашылығы басқармасы басшысының міндетін атқарушы Берік Ситказиевтің алғысхатымен, аудан әкімі Мұрат Өмірәлиевтің алғысхатымен және «Үздік» номинацияларымен, ауыл шаруашылығы қызметкерлерінің салалық кәсіптік одағының «Елеулі еңбегі үшін», ІІ дәрежелі «Еңбек даңқы» медальдарымен сала қызметкерлері кәсіби мерекелеріне орай ауданымыздың ауыл шаруашылығы саласын дамытуға қосқан үлестері үшін наградталды.
Сондай-ақ өткізілген жарыс жеңімпаздары да марапаттарын алды. Жалпы командалық есеп бойынша Ардақ ауылдық округі ІІІ, Ақбұлақ ауылдық округі ІІ, Ақшат ауылдық округі командасы жүлделі І орынды иеленді.
Жеңімпаздарға медаль, диплом, кубоктар мен сый-сыяпаттар табысталды.
Мерекелік шара әсем әндер тыңдаумен жалғасып, естелік суреттерге түсумен аяқталды.
Жоғары деңгейде ұйымдастырылған салтанатты шараның тағы бір ерекшелігі аудан кәсіпкерлерінің өндіріп отырған ауылшаруашылық өнімдері қойылған көрме болды. Келушілер жерлестерінің табиғи, құнарлы, дәмді өнімдерінен дәм татты. Аудан басшысы өз жерімізде өндірілген сүт, ет өнімдері, дәнді-дақылдар, көкөніс-жемістер, нан өнімдерінен ауыз тиіп, кәсіпкерлерге толағай табыс тілеп, еңбектері үшін алғысын білдірді.
Гүлжазира Асу
Шыңғырлау ауданы
