Бүгін Шыңғырлау ауданы Дән ауылдық мәдениет үйінде балаларға арналып мультфильм көрсетілімі өтті. Оқу жылының көктемгі үзіліс уақытында демалыстарын қызықты өткізсін деген мақсатта ұйымдастырылған шараға келгендер бауырлар татулығы, отбасындағы бірлік, сыйластық, сыпайылық көрініс тапқан мультфильмнен көп нәрсе түйіп қайтты.
Қызықты көрсетілімге жиналған бүлдіршіндер үйде теледидар, телефоннан қарағаннан көрі, ауылдас балалармен бірге тамашалағандықтан, ерекше әсер алып, мәз-мейрам болып тарасты. Бір-бірімен бөлісіп, шаттана айтып жүретін қызықты сәттер мен ерекше естеліктердің бірі болды.
Айта кететіні, аудан тұрғындарына осыған дейін де бірқатар фильмдердің көрсетілімі қойылған болатын. Әсіресе Отандық туындыларды тамашалауға халық көптеп жиналады. Бұл тамаша шара алдағы уақытта да жалғасын таппақ.
Гүлжазира Асу,
Шыңғырлау ауданы
