Шыңғырлау ауданында коронавирус ауруын жұқтырғандардың саны күннен-күнге өсуіне орай әлі «қызыл аймақтан» шыға алмай отыр. Аудан әкімінің орынбасары Азамат Бисембаевтың төрағалығымен коронавирус ауруының алдын алуға арналған штаб отырысы онлайн форматта өтті.
Аудан орталығы – Шыңғырлауда, Ардақ, Ақшат және Ащысай ауылдарында «COVID-19» вирусын жұқтырған тұрғындардың анықталуына орай аудандық санитарлық-эпидемиологиялық бақылау басқармасының басшысы Ермек Сабировтың жаңа қаулысы жарияланды. Қаулыда 16 ақпан мен 1 наурыз аралығында сақтық шараларын одан әрі күшейту, кәсіпкерлік нысандардың жұмыс жасау регламентін қысқарту, санитарлық талаптардың дұрыс орындауын қадағалау, т.б. шектеулер енгізілген.
Аудандық бас санитарлық дәрігер Е.Сабировтың хабарлауынша, ауданда 2021 жыл басынан бері коронавирустық жұқпасымен 134 науқас тіркелген. Соның ішінде тек ақпан айының 15-не 74 адамнан аталмыш вирус анықталған.
Сондықтан сақтық шараларын күшейтіп, мүмкіндігіміз келгенше ешқайда шықпауға, адамдар көп шоғырланатын орындарға бармауға, өзімізді-өзіміз күтуге тырысайық! Себебі сақтық шаралары орындалмаса, бәрімізге бірдей қауіп төнеді.
Аман Ізмұхан,
Шыңғырлау ауданы
zhaikpress.kz
