Шыңғырлауда Ұлыстың Ұлы күні мерекесіне арналған «Наурыз - думан!» атты театрландырылған мәдени шара оздырылды. Мәнді де маңызды шараның Асан Қайғы ескерткішінің алаңында ұйымдастырылуы мерекені одан әрі ерекшелендіріп жібергендей.
Алаңда киіз үйлер тігіліп, мекелемелер тарапынан дастархан жайылып, халыққа наурыз көже және қазақтың өзге де ұлттық тағамдарын үлестірді. Ал кимешек киген әжелер, ұлттық киімде киінген мәдениет қызметкерлері, ақ жаулық тартқан «Айнамкөз» келіндер клубының мүшелері ән айтып, наурыз тақырыбындағы театрландырылған көріністер қойылып, көпшілікке тамаша көңіл күй сыйлады.
Ата-бабаларымыз арғы тегіміз мыңдаған жылдардан бері тойлап келе жатқан жыл басы Наурыз мерекесімен құттықтау үшін сөз аудан әкімі Әлия Мұханбетжанова ортаға шығып, құттықтау сөзін арнады.
Әкім құттықтауынан соң, мереке одан әрі жалғасып, әсем ән шырқалып, би биленді. Әсіресе туған жер, ауыл туралы әндер көптеп орындалды. Осы мерекелік қызықтардың ішінде қол күрес, гір тасын көтеру, арқан тартыс, бұқа тартыс, ләңгі тебу, қой және қозы көтеру сияқты сайыстар бірінен соң бір жалғасып, көпшіліктің көңілі көтеріліп, тамашаның бел ортасында жүрді.
Наурыз тойдың соңын, «Наурыз құтты болсын,
Дендеріміз сау, мықты болсын!
Наурыз тойы келе берсін,
Барлық халық бақытты бола берсін»,-деп аяқтаған жүргізуші баршаға амандық тілеп, қоштасты.
Айсұлу Арыстанова,
Шыңғырлау ауданы
zhaikpress.kz
