Бүгін (16 желтоқсан) Жалпақтал ауруханасының перзентханасында таудай ұл дүниеге келіп, Тәуелсіздік мейрамында ауылымызды қуанышқа бөледі.
Ел Тәуелсіздігінің 30 жылдық мерейтойы күні дүниеге келген батыр ұлымыздың салмағы 3,125 келі, бойы 51 сантиметр.
Ақпәтерлік өнерпаз ұстаз Ержан Құмарғалиевтің жанұясын толықтырып отырған ұлымыз екі қыздан кейін көрінген отбасындағы үшінші перзент екен.
Батыр ұлдың анасы Сейітқалиева Дания Арманқызы Ақпәтер ауылының медбикесі болып жұмыс жасайды.
- Қазақстан Республикасы Тәуелсіздігінің 30 жылдық мерейтойы күні қасиетті ұлық мерекеде дүниеге келген ұлымыз бен жас ана атанған Дания қызымыздың денсаулықтары жақсы. Сәби 16 желтоқсан күні таңда дүниеге келді. Сәті солай болған шығар, мен бүгінгі күні дүниеге келген шақалақ сәбидің әкесі, тәуелсіздіктің құрдасы Ержан Құмарғалиев баламның да кіндігін өзім кескен едім. Енді міне, сол Ержанның сәбиінің де кіндігін өзім кесіп отырмын,-дейді аурухана акушері, ел анасы атанған Сәния Қайырғалиқызы Дүйсенбаева.
Тәуелсіздіктің 30 жылдық мерейтойы күні Жалпақтал ауруханасынан Қазақ елінің санын бір азаматқа арттырған сәбиіміздің бауы берік болсын! Болашақта ата-анасымен бірге аман болып, ел тұтқасын ұстар тұлғалы азамат атануына тілектеспіз.
Қуаныш құтты болсын, қазақ елі!
Қыдыр Харесұлы,
Казталов ауданы
zhaikpress.kz
