Күн сайын жыр-өлең туып, апта сайын әлем чемпионы шығатын Сырым даласының даңқы бүгін Алатау төрінде дүркіреді. Республика спортының 2022 жылғы даму жетістіктерінің қорытындысы бойынша Сырым ауданының әкімі Төлеген Төреғалиев ел бойынша "Спортқа жанашыр үздік аудан әкімі" атанды.
Аудан басшысының жұмысы халықты бұқаралық спортқа жұмылдыру, ірі деңгейдегі жарыстарды өткізу, ең бастысы спорттық нысандарды көптеп ұйымдастыру бағыттары бойынша бағаланған.
Айта кетейік, бұл Төлеген Төреғалиевтің әкімдік қызметі үшін алған алғашқы марапаты емес. Ол осыған дейін ҚР Президенті Қасым-Жомарт Тоқаевтың жарлығымен "Құрмет" орденінің иегері атанды. Алматы қаласындағы Қазақ Спорт және Туризм академиясында өткен салтанатты шарада аудан үшін мерейлі марапатты Сырым ауданы әкімінің орынбасары Артур Шерғалиев қабылдады. Ақжолтай жаңалықтың бас-аяғы бұл емес.
Сырым аудандық мәдениет, тілдерді дамыту, спорт және дене шынықтыру бөлімі республика бойынша "Үздік спорт бөлімі" атанды. Бөлім жанындағы "Қайсар" спорт клубының (директоры Ерболат Мұқанов) нәтижелі жұмысына әр сырымдықтың қосқан үлесі бар.
Бауыржан Ширмединұлы,
Сырым ауданы
zhaikpress.kz
