Қазіргі таңда негізгі көмек те, күш те Орал қаласына қарай құйылуда. Себебі Жайық жағасындағы шаһар өзеннің ғасырда болмаған тасқынынан қауіп күтіп отыр.
Кеше ғана сырымдық спортшылар, педагогтар және мәдениет қызметкерлерінің қаладағы су басу қаупінің алдын - алу шараларына қатысқанын жазған едік. Бүгін саптан Алғабас ауылындағы М. Қаналиев атындағы мектептің ұстаздары табылды.
- Көңіл үшін бір - екі адам емес, бірқатар азаматтар ауылдан көш - керуен болып аттандық. Алғабастық ұстаздар құм қаптау, вагондардан гуманитарлық көмектерді түсіріп, көліктерге тиеу жұмыстарына атсалысты. Сырым Оралмен бірге! - дейді мектеп тәлімгері, ерікті педагог Нұрболат Жұмағазиев.
Айта кетерлігі, туған қаласын судан қорғаймын деп жанталасқан жігіттердің арасында 4 сынып оқитын Айсезім де жүр. Айтуынша, үйін қорғау үшін ата - анасымен бірге тасқынға қарсы күрес шараларына қатысуға келіпті.
Айсезім ағаларына қаптардың ауызын ұстасып жүр.
Бауыржан Ширмединұлы,
Сырым ауданы,
zhaikpress.kz
