Соңғы жылдары Тасқала ауданында тұрғын үй кезегінде тұрған жандарды баспанамен қамту бойынша жүйелі жұмыстар жүргізіліп келеді. Соның бір жарқын дәлелі 5 ауылдық округте жаңа тұрғын үйлердің салынып, халық игілігіне берілуі. Бүгін, Қазақстан ауылдық округіне қарасты Атамекен ауылында өткен қоныс тойдың куәсі болып, халықтың шынайы ризашылығын көріп қайттық.
Айта кетейік бұл үйлер «АMANAT» партиясының 2023-2027 жылдарға арналған «Халықпен бірге!» бағдарламасы аясында және «Тұрғын үй-коммуналдық инфрақұрылымды дамытудың 2023-2029 жылдарға арналған тұжырымдамасын бекіту туралы» Қазақстан Республикасы Үкіметінің 2022 жылғы 23 қыркүйектегі №736 қаулысына сәйкес жүзеге асырылуда. Жалпы биылғы жылы аудан бойынша кезекте тұрған халықтың әлеуметтік осал топтарына арнап 34 пәтер сатып алуға 652 млн.478 мың теңге қаражат бөлінген болатын. Сол қаражатқа салынған алғашқы тұрғын үйлер осыған дейін Мерей, Ақтау ауылдарында толықтай пайдалануға берілсе, бүгін Атамекендік ағайындар да су жаңа басапананың иесі атанды.
Аталмыш шараға аудан әкімінің міндетін уақытша атқарушы Рауан Рахметуллин мен «AMANAT» партиясы Тасқала аудандық филиалының төрағасы Люция Жұбанышқалиева және Қазақстан ауылдық округі әкімінің міндетін атқарушы Нұрлан Естеков пен ауыл тұрғындары қатысты. Алғаш болып сөз алған Рауан Бисенғалиұлы жиналғандарды айтулы күнмен құттықтап, ауданда баспана салу бойынша атқарылып жатырған жұмыстарды тілге тиек етті. Мердігерлерге алғысын білдірді. Сондай-ақ, үй кезегінде тұрған 8 отбасына жаңа пәтердің кілтін салтанатты түрде табыс етті. Ақ жаулықты әжелеріміз шашу шашып, әншілеріміз әуелете ән шырқады. Салтанатты жиында ауыл тұрғыны, жаңа баспананың иесі Ажар Нигметова да сөз сөйлеп, аудан басшыларына шынайы ризашылығын білдіріп, ақ батасын берді.
Содан соң Рауан Бисенғалиұлы жаңа пәтердің ішін аралап көрді. Ауыл тұрғындары да заманауи үлгіде салынған тұрғын үйлерге кіріп, шашу шашып, үйлі болған жерлестеріне құтты болсын айтты.
Назгүл Серікқызы,
Тасқала ауданы
