Бүгін Тасқала ауданы әкімі Талғат Шакиров ардагерлермен кездесті. Әкімдіктің мәжіліс залында өткен кездесуге аудан әкімінің орынбасары Саягүл Галиева, аудандық ардагерлер кеңесінің төрағасы Жәрдемғали Балыков, ауылдық округ әкімдері мен бөлім басшылары, сондай-ақ ардагер ақсақалдарымыз қатысты.
Алдымен жиынды ашқан аудан басшысы Талғат Асқарұлы жиналғандарды келе жатқан Жаңа жыл мерекесімен құттықтап, ауданда атқарылған игі істерді тілге тиек етті. Алдағы жылдың жоспарымен бөлісіп, үлкендердің пікірлерін тыңдады.
Содан соң аудандық ардагерлер кеңесінің төрағасы Жәрдемғали Абылғалиұлы кеңестің жыл бойы атқарған жұмысын саралап өтті.
Әдемі дастархан басында ардагерлер саяси қуғын сүргін құрбандарына ескерткіш қою, ардагерлер саябағын жөндеу, мал жайылымын реттеу, трансформаторлардың айналасын қоршау, ауыз су тапшылығы, көше жарығы, балалар ойын алаңдарын жөндеу, қала мен екі ортаға қатынайтын автобустың регламентіне өзгеріс енгізу, дүкендерде әлеуметтік тауарлар тұратын бұрыштың болуы сынды сұрақтарды көтеріп, оған нақты жауаптарын алды.
Жиын барысында белсенді ардагерлерге аудан әкімінің атынан алғыс хат табыс етілді.
Назгүл Серікқызы
Тасқала ауданы
