Жаңа жыл мерекесі қарсаңында Тасқала ауданы әкімі Талғат Шакиров Орал қаласындағы олимпиада резервінің облыстық мамандандырылған мектеп-интернат-колледжінде болып, сол жерде тәрбиеленіп жатқан ауданымыздың жас спортшыларымен кездесті. Айта кетейік, аталмыш оқу орнында Тасқала ауданы бойынша 7 оқушы білім алып, тәрбиеленіп жатыр.
Өз кезегінде сөз алған аудан басшысы Талғат Асқарұлы жиналғандарды жаңа жыл мерекесімен құттықтады.
– Санаулы күннен соң 2024 жылмен қош айтысып, 2005 жылға қадам басатын боламыз. Өткен жылға өкпе жоқ, келер жылдан үміт көп демекші, биылғы жылымыз жаман болған жоқ. Келер жылымыз одан да жақсы болып, ойлдаған армандарыңызға жетіңіздер. Біз жетпеген жетістіктерге сіздер жетіп, ауданымыздың мақтанышы болып жүре беріңіздер. Араларыңыздан Азия, әлем, Еуропа чемпиондары және олимпиада ойынының жүлдегерлері шығады деген үмітіміз зор. Жолдарыңыз ашық болсын, сіздерді биіктерден көрейік, - деген аудан басшысы болашақ чемпиондарға спорттық киім мен тәттілер толы дорбаны сыйға тартты.
Кездесуге облыстық мамандандырылған мектеп-интернат-колледжінің тәрбиеленушісі, болашақ чемпион Инабаттың әкесі Нұрлан Мамбетов те қатысып, аудан басшылығына ата-аналар атынан ризашылығын білдірді.
– Бүгін Талғат Асқарұлы уақыттың тығыздығына қарамастан облыс орталығына келіп балалармен кездесіп, құттықтап жатқаны бізді қуантты. Бұл балалар үшін үлкен мәртбе және бұл бірінші рет. Сондықтан, менде ата-ана ретінде Талғат Асқарұлына балаларды елеп-ескеріп жатқаны үшін алғысымды айтамын. Осындай басшысы бар елде спорт кенже қалмайды деп ойлаймын. Болашақта балаларымызда ауданымыздың намысын қорғап, биік белестерді бағындыратын болады. Оған мен кәміл сенемін, - дейді ол өз сөзінде.
Назгүл Серікқызы
Тасқала ауданы
