Тасқала ауданында табиғи және техногендік сипаттағы төтенше жағдайлардың алдын алу және құтқару кезінде өзге де кезек күттірмейтін жұмыстарды дайындау мен жүргізу бағытында кешенді оқу-жаттығу өтіп жатыр.
Оқу-жаттығу жұмысы алдымен аудан әкімінің орынбасары Рауан Бисенғалиұлының төрағалығымен өткен аудандық төтенше жағдайлардың алдын алу және қою жөніндегі аудандық комиссияның отырысынан басталды.
Жиын барысында Рауан Бисенғалиұлы қызмет басшыларына әр штаттық емес оқиғалардың дер кезінде алдын алу және олардың салдарын жою бағытындағы әрекеттерді тиімді орындау үшін тиісті тапсырмалар жүктеді.
Оқу-жаттығу жоспарына сәйкес аудан әкімдігінің ғимаратында сейсмикалық жаттығу барысындағы дабыл бойынша жауапты тұлғалар мен қызметкерлердің іс-әрекеттері зерделенді.
Одан соң жоспарға сәйкес аудандық аурухана ғимаратында өрт дабылы кезіндегі азаматтық қорғаныс құрылымдарының оқу-жаттығуы өткізілді. Жаттығу барысында өрт ошағын сөндіру, зардап шеккендерді эвакуациялау, өрт ошағын оқшаулау, өрттің ғимарат аумағына таралуын болдырмау мақсатындағы іс-әрекеттер сараланды.
Бұдан бөлек, Рауан Бисенғалиұлы және оқу-жаттығуды байқаушылар, яғни ТЖД-ның қызметкерлері аудандық шұғыл әрекет ету топтарының дайындығын тексерді.
Назгүл Серікқызы
Тасқала ауданы
