Тасқалада түлектер арасында өткен турнир аяқталды

Тасқала ауданындағы Шежін ауылында әр жылдары мектеп бітірген түлектер арасында волейбол мен футболдан дәстүрлі турнир өтті.

Оған аудан әкімі Талғат Шакиров пен облыстық мәслихат депутаты, Шежін мектебінің түлегі Нұртай Жұмашев сондай-ақ, ауыл әкімі Мержан Исқалиев және мектеп түлектері арнайы қатысты.

Командалар бақ сынаған доп додасы ауыл орталығында орналасқан спорт алаңында өтті.

– Жылдағы дәстүр бойынша биыл ауылымызда футбол мен волейболдан турнир өтіп жатыр. Оны ұйымдастырушы – ауыл азаматы, облыстық мәслихаттың депутаты, жерлесіміз Нұртай Сәпиұлы. Жыл сайын осындай уақытта әр жылдардағы мектеп түлектерінің басын қосып, керемет шара ұйымдастырып келе жатқанына биыл тоғызыншы жыл екен. Бұл жақсы дәстүр келер жылы да өз жалғасын табатын болады. Ауыл азаматтарын ынтымақ пен бірлікке, ұйымшылдыққа шақырып бір-бірімен жақындастыра түсетін мұндай спорттық ойындардың жиі ұйымдастырылғаны дұрыс. Бұл басқа ауылдарға үлгі болатын дүние. Осылайша біз тұрғындар арасындағы бұқаралық спорттың дамуына ықпал етеміз. Екі күнге созылған жарыс жоғары деңгейде өтті. Ұйымдастырушыларға ризашылығымыз шексіз, - дейді ауыл әкімі Мержан Сүндетқалиұлы.

Айта кетейік, ойын ардагерлер мен орта жас және жастар арасындағы топтардың ортасында өтті. Жарысқа 16 команда қатысып, бақтарын сынады.

Жеңімпаз командалар қаржылай сыйлықпен марапатталды. 1 орынға 50 мың теңге болса, 2 орынға 30 мың, ал 3 орынға 10 мың теңге тігілді.

Волейбол ойыны бойынша ардагерлер командасынан жүлделі 1 орынды 1982 жылғы түлектер жеңіп алса, 2 орын 1973 жылғы, ал 3 орын 1980 жылғы түлектерге бұйырды.

Орта жастар арасында 1 орын 1988 жылғы түлектерге бұйырса, 2 және 3 орын тиісінше 1983 пен 1985 жылғы түлектердің еншісіне тиді.

Ал жастар арасында жүлделі 1 орынды 1992 жылғы түлектер жеңіп алса, 2 орын 2005 жылғы, 3 орын 2004 жылғы түлектер командасының қанжығасында кетті.

Футбол ойыны бойынша ардагерлер арасында 1 орын 1976 жылғы түлектердің командасына бұйырса, 2 орынды 1980, 3 орынды 1973 жылғы түлектер өзара бөлісті. Орта жас бойынша 1990 жылғы түлектер жақсы ойын өрнегін көрсетіп 1 орынға қол жеткізсе, 1989 жылғы түлектер 2 орынға жайғасты.

Ал 1988 жылғы түлектер 3 орынды місе тұтты. Жастар арасында 2004 жылғы түлектер 1 орынды, 2000 жылғылар 2 орынды иеленсе, 2005 жылғы түлектер жүлделі 3 орынға табан тіреді.

Аталмыш турнирдің өтуіне Нұртай Сәпиұлының өзі демеушілік танытты. Ойын барысында аудандық мәдениет үйінің әншілері әннен шашу шашып, шараның әдемі өтуіне мұрындық болды.

Назгүл Серікқызы
Тасқала ауданы