Домбыра – қазақтың ғасырлар толқынына жасырған шежіресін сақтап келген ұлттық аспаптың бірі. Қуанышы мен жұбанышы, қайғысы мен мұңында да қазаққа киелі домбыра серік болды. Шілде айының алғашқы жексенбісі – Ұлттық домбыра күні. Осы орайда бүгін Тасқаладағы Абай алаңында «Аmаnаt» партиясының ұйытқы болуымен, аудандық мәдени-демалыс орталығының ұйымдастыруымен Ұлттық домбыра күніне арналған «Домбыра – қазына» атты мерекелік шара өтті.
Оған қатысқан аудан әкімінің орынбасары Саягүл Галиева барша жұртшылықты Домбыра күнімен құттықтады.
«Қазақ пен домбыра – егіз ұғым. Күмбірлеген домбыраның үні батырларымызға рух, ақындарымызға шабыт берген. Домбыра әрбір қазақтың рухын көкке көтеретін құнды қазынамыз болуы тиіс. Ұлттық домбыра күні – рухани жаңғырудың әдемі көрінісі. Баршаңызды Ұлттық домбыра күнімен құттықтай отырып, бақытты да баянды өмір, зор денсаулық, жемісті еңбек, шаңырақтарыңызға шаттық пен қуныш, құт-береке тілеймін», - деген аудан әкімінің орынбасары Саягүл Мәулетқызы бір топ мәдениет саласының қызметкерлеріне алғысхат табыс етті.
Шара барысында 100 домбырашы бір мезетте ұлттық аспапта «Адай» және «Балбырауын» күйлерін ойнап, домбыраның күмбірлеген үнімен көрерменді ерекше әсерге бөледі.
Болатбек Сапарғалиев
Тасқала ауданы
