Білім қызметкерлерінің арасындағы ынтымақтастық пен достықты арттыру, өзара салауатты өмір салтын насихаттау мақсатында Тасқала аудандық білім беру бөлімінің қысқы спартакиадасы өтті.
Аталмыш шараның ашылу салтанатында аудан әкімінің орынбасары Саягүл Галиева, білім беру бөлімінің басшысы Айгүл Касимова және білім саласының қызметкерлері қатысты. Саягүл Мәулетқызы атаулы күнге орай игі тілегін жолдап, ұйымдастырылып отырған доданың бүгінгі күндегі маңыздылығына тоқталып өтіп, қатысушыларға сәттілік тіледі. Салауатты өмір салтын насихаттау, ұлттық спорттың мәртебесін арттыруды көздеген байқауға білім саласының қызметкерлері құралған командалар қатысты. Спартакиадада қатысушылар арқан тартыс, бес асық, шаңғы жарысы, үстел тенисінен мектеп намысын қолдан бермеуге тырысты. Жарысқа қатысуға өз ықыластарын білдірген командалар тартысты ойын өрнегін көрсетті.
Спартакиада нәтижесі бойынша I орын - Қ.Сәтбаев атындағы МГ, II орын- Сәулет МЛ, III орын - Қосымша білім беру ұйымдары қанжығаларына байлады. Жарыстың марапаттау кезеңінде білім беру бөлімінің басшысы Айгүл Қадырбайқызы барша қатысушы командарларға спартакиадаға белсенділік танытып қатысқандары үшін алғысын білдірді. Жарыстың жекелеген түрлерінен жүлдегер атанған ойыншылар аудандық білім беру медальдарымен марапатталса, жарыстың жеңімпаз командалары арнайы кубоктарға ие болды.
Гүлмира Серікқалиқызы,
Тасқала ауданы
