Теректі ауданы әкімдігінің үлкен мәжіліс залында аудандық мәслихаттың кезектен тыс он үшінші сессиясының отырысы өтті.
Сессия отырысына аудандық мәслихат төрағасы Әлжан Нұрғалиев, аудан әкімі Әлия Мұханбетжанова, мәслихат депутаттары мен ауылдық округ әкімдері қатысты.
Ең алдымен, аудандық экономика және қаржы бөлімінің басшысы Ғабит Газиев Теректі ауданының 2024-2026 жылдарға арналған бюджетін бекіту туралы шешімге енген өзгерістер жайында баяндады. Мәслихат төрағасы Әлжан Жақсыгерейұлы ауданның қоғамдық кеңесі мүшелерінің ауыс-түйісі туралы сөз қозғады. Теректі ауданы әкімі аппаратының басшысы Мирлан Еркибаев терроризмге қарсы және төтенше жағдайлардың алдын алу жөніндегі комиссиялардың құрамдарына енгізілген толықтырулар мен өзгерістер жайын айтты.
Жиынға қатысушылар баяндамашыларға сұрақтарын қойып, толыққанды жауап алды.
Сессияда қаралған мәселелер депутаттар тарапынан қолдау тапты.
Сессия соңында аудан басшысы Әлия Биғазықызы бірнеше жыл бойы ауданымыздың дамуына үлес қосып, өзінің орынбасары болып қызмет еткен Амангелді Тоғызбаевтың басқа жұмысқа ауысуына байланысты алғысхат пен естелік сыйлық табыстады. Сессия отырысына қатысқан округ әкімдері Амангелді Кәрімұлына жаңа жұмысында сәттілік тіледі.
Аягөз Айтқалиева,
Теректі ауданы
zhaikpress.kz
