Тасқала ауданында «Ұлттық рухани жаңғыру» ұлттық жобасы аясында әрі халықтық «Ақтілеу» әжелер ансамблінің 35 жылдық мерейтойына арналған халықтық әжелер ансамблдері арасындағы «Ақ жаулығым — тұмарым» облыстық байқау өткен еді. Айта кетейік, халықтық әжелер ансамблдерінің мәдени-рухани қызметін жетілдіру, ұлттық құндылықтарымызды насихаттау, салт-дәстүрді дәріптеу — шараның ең басты мақсаты.
Осынау байқауға Теректі ауданы атынан халықтық «Шежіре» әжелер ансамблі қатысқан болатын.
Жалпы, аталмыш ансамбль 2012 жылы құрылған. Дәл қазіргі таңда бұл топты 10-нан астам адам құрап отыр. Сондай-ақ репертуарында 20-ға жуық халық әндері бар. Ұжымның жетекшісі, Теректі аудандық мәдени демалыс орталығының әдістемелік бөлім меңгерушісі - Айгүл Қайрова.
Хош, сонымен халықтық «Шежіре» ансамблі байқаудың шарты бойынша өздерін таныстырып, ұмытылып бара жатқан салт-дәстүрден көрініс қойды. Сонымен қатар халық әндерін әуелетіп, қолөнер көрмесін әзірледі.
Сайып келгенде, жоғары деңгейде өнер көрсетіп, «Халық ықыласы» номинациясына ие болды.
Айшабибі Мәмет,
Теректі ауданы
zhaikpress.kz
