Бүгін Орал қаласындағы “Атамекен” өнер ордасында “Бөкей ордасы - тұңғыштардың мекені” атты көрме мен мерекелік концерт өтті.
Бірден айталық, Бөкей хандығының 225 жылдығына арналған іс-шаралар тек бір күнмен, бүгінгі шаралармен шектелмейді. Үлкен той алда.
Бұл туралы "Атамекен" өнер ордасында болған салтанатты шарада облыс әкімі Нариман Төреғалиевтің өзі айтты. Жұртшылықты айтулы күнмен құттықтаған өңір басшысы үлкен тойдың қыркүйекке жоспарланғанын, тойға дайындық жұмыстары 2023 жылдан басталып, ауылдың жолы, мектебі мен мәдениет үйі жөнделіп, су жаңа ғимараттар бой көтергенін айтып өтті. Шараға ҚР Президентінің кеңесшісі Мәлік Отарбаев, аудан әкімі Нұрлыбек Даумов, зиялы қауым өкілдері, облыс тұрғындар мен қонақтары, барша бөкейліктер қатысты.
Шара меймандары алдымен хандықтың тарихына негізделген көрмемен танысты.
Кейін театр және кинорежиссері, кинодраматург, өнертану профессоры, Қазақстанның халық әртісі, Парасат, Құрмет ордендерінің иегері Талғат Теменовтің "Жәңгірдің жаңғыруы" атты деректі фильмін тамашалады.
Сахна төріне көтерілген өңір басшысы Нариман Төреғалиев, ҚР Президентінің кеңесшісі Мәлік Отарбаев сөз алып, жиналған қауымды тарихи күнмен құттықтады. Облыс басшысы хандық тарихын таспалаған режиссер Т.Теменовтің иығына шапан жауып, сыйкәде табыстап, құрмет көрсетті.
Мерекелік шара концерттік бағдарламамен жалғасты. Көрермен қауым назарына театрландырыланған қойылым мен күй тартыс, әуезді ән мен мың бұрылған би ұсынылды. Концерттік бағдарлама барша бөкейліктердің гимніне айналған “Орда - туған мекенім” әнімен тәмамдалды.
Анар Артықбай
Суретке түсірген Әділет Абдиров
Бөкей ордасы ауданы
