Қыркүйек айының 26-сы мен қазан айының 1-інші жұлдызы аралығында Сырым ауданында облыстық, республикалық деңгейдегі бірқатар шаралар өтеді. Сырым ауданының әкімі Төлеген Төреғалиев Батыс Қазақстан облысының Өңірлік коммуникациялар қызметінің алаңында баспасөз мәслихатын өткізіп, жоспарын таныстырды.
-Қазақтың тарихында ұлттық азаттық үшін болған арпалыстар, теңдікті көксеген көтерілістер көп орын алды. Олардың көш басында – Сырым Датұлы тұр. Қырлай берген сайын гауһар тастың жарқырай беретіндігі сияқты, Сырымның сан қыры оны феноменге айналдырып тұр. Ол – батыр, би ғана емес, ішкі және сыртқы саясатқа жетік дала дипломаты. Сырым құрған «Халық кеңесі» - қазір әлем ауысып жатқан демократияның ірі арнасы. Ал Жаһанша Досмұхамедов – қазақтың маңдайына туған арыс. Әлихан Бөкейханов, Ахмет Байтұрсынов, Мұстафа Шоқайлар құрайтын тарихтың маржан моншағының асыл тасы – Жаһанша. Қос тұлғаның туған жері ретінде Сырым ауданы тойдың туын көтеруде. Ауданда тұтас бір апта бойы мәдени-көпшілік шаралар өтеді.
Батырдың ерлік дастаны баспадан қайта басылып шығады. Жымпиты топырағында ғалымдар кеңесіп, тарихтың жаңа парақтарын оқиды.
Спортсүйер қауым үшін жақсы жаңалық – Жымпитыда «Алаш барысы - 2» республикалық турнирі өтеді. Басты қонақ – «Қазақстан барысы» атанған Мақсат Исағабылов. Апайтөс алыптардың айқасын Жымпитыға келіп көруге болады.
Әрине, той болғасын жүйріктер жарысады, ақындар айтысады. «Алтын домбыралы» ақындар – Бекарыс Шойбеков, Мұхтар Ниязов, Жансая Мусина бастаған белгілі жыр дүлдүлдері Сырым мен Жаһаншаның елін жырлауға келе жатыр.
Тойдың емес ойдың заманындамыз. Сондықтан Сырым еліндегі әрбір шара – қазақ руханиятына олжа салатын болады. Елімізге құрметті қонақ болуға шақырамын! – деді Төлеген Төреғалиев.
Мәслихатқа қатысқан аудандық мәслихат депутаты, С.Датұлы атындағы тарихи-өлкетану музейінің директоры, өлкетанушы Айнагүл Ойшыбаева шаралардың тарихи келбетіне тоқталды.
Тікелей эфир «AQJAYIQ» телеарнасы арқылы таратылды.
Бауыржан Ширмединұлы,
Сырым ауданы
zhaikpress.kz
Суреттерді БҚО өңірлік коммуникациялар қызметі ұсынды
